പശ്ചാത്തലമല്ല, വേണ്ടത്​ ലക്ഷ്യബോധം -ജുനൈദ്​

കഠിന പ്രയത്നത്തിനൊടുവിൽ രണ്ടാമൂഴത്തിലാണ്​ വേങ്ങര ഊരകം വെങ്കുളം സ്വദേശി പി.പി. മുഹമ്മദ്​ ജുനൈദിന്​ സിവിൽ സർവിസ്​ എന്ന ലക്ഷ്യത്തിലേക്ക്​ എത്താൻ സാധിച്ചത്​. 200ാം റാങ്കിലെത്തിയ ജുനൈദിന്​ ഉയരങ്ങൾ കീഴടക്കാൻ പ്രചോദനമായത് പിതാവ്​​ മദ്​റസ അധ്യാപകനായ പുത്തൻ പീടിയേക്കൽ അബ്​ദുൽ ജബ്ബാർ ബാഖവിയും ഉമ്മ സയ്യിദ ഖാത്തുനും നൽകിയ പ്രചോദനമായിരുന്നു. ഐ.എ.എസ്​ കിട്ടണമെന്ന ​ആഗ്രഹത്തോടെ തന്നെയായിരുന്നു ശ്രമിച്ചത്​. സ്കൂൾ പഠനകാലത്ത്​ തോന്നിയ മോഹം എൻജിനീയറിങ്​ പഠനസമയത്തും തുടർന്നു. ഊരകം നെല്ലിപറമ്പ്​ ഗവ. മോഡൽ എൽ.പി സ്കൂൾ, നെല്ലിപറമ്പ്​ പി.എം.എസ്​.എ എ.യു.പി.എസ്​, ഊരകം മർകസുൽ ഉലൂം ഹൈസ്കൂൾ, എടരിക്കോട്​ പി.കെ.എം.എച്ച്​.എസ്​.എസ്​ എന്നിവിടങ്ങളിലായിരുന്നു പഠനം.

തിരുവനന്തപുരം സി.ഇ.ടിയിൽനിന്ന് എൻജിനീയറിങ്ങിൽ ബിരുദം. രണ്ടുവർഷത്തോളം ബംഗളൂരു ഐ.ഐ.എമ്മിൽ ജോലി ചെയ്തു. പിന്നീട്​ ജോലി രാജിവെച്ച്​ രണ്ടുവർഷം പരീക്ഷക്കായി മുഴുവൻ സമയ പഠനമായിരുന്നു. രാജസ്ഥാൻ കാഡറിലാണ്​ നിയമനം ലഭിച്ചത്​.

ശ്രീഗംഗനഗർ ജില്ലയിൽ അസി. കലക്ടറായിട്ടായിരുന്നു പരിശീലനം. ജാലാവാഡ്, ഭരത്​പൂർ​ ജില്ലകളിൽ സബ്​ കലക്ടർ (സബ്​ ഡിവിഷനൽ മജിസ്​ട്രേറ്റ്​) ആയിരുന്നു. ഈ വർഷം ജനുവരി മുതൽ ശ്രീഗംഗനഗർ ജില്ല പരിഷത്ത്​ ചീഫ്​ എക്സിക്യൂട്ടിവ്​ (ജില്ല വികസന കമീഷണർ). ഭാര്യ: ഡോ. ​ഹന്ന (കമ്യൂണിറ്റി ഹെൽത്ത്​ സെന്‍റർ).