മലപ്പുറത്തിന്‍റെ സിവിൽ സർവിസ്​: വി ഫോർ വിവേക്​

മെക്കാനിക്കൽ എൻജിനീയറിങ്ങിൽനിന്ന് ചുവടുമാറ്റി സിവിൽ സർവിസിൽ വിജയ ചിഹ്നം കാണിച്ച വ്യക്തിയാണ് വിവേക് ജോൺസൺ. മലപ്പുറം മുണ്ടുപറമ്പിലെ മൂന്നാംപടിക്കൽ വീട്ടിൽ എം.ബി. ജോൺസൺ-നീന ദമ്പതികളുടെ മകനാണ്. സ്കൂളിൽ പഠിക്കുന്ന കാലത്ത് ഇന്ത്യൻ ഇൻസ്റ്റിറ്റ്യൂട്ട് ഓഫ് ടെക്നോളജി(ഐ.ഐ.ടി)യിൽ ചേർന്ന് പഠിക്കാനായിരുന്നു ആഗ്രഹം. മലപ്പുറം കേന്ദ്രീയ വിദ്യാലയത്തിലായിരുന്നു ഒന്നുമുതൽ പത്തുവരെ. ഐ.ഐ.ടി ലക്ഷ്യമിട്ട്​ രാജസ്ഥാൻ ജയ്പൂരിലെ ഇമാന്യുൽ മിഷൻ സീനിയർ സെക്കൻഡറി സ്കൂളിൽ പ്ലസ് ടുവിന്​ ചേർന്നു. പാലക്കാട് എൻ.എസ്.എസ് എൻജിനീയറിങ്​ കോളജിൽ മെക്കാനിക്കൽ എൻജിനീയറിങ്​.

അവസാന വർഷത്തിലാണ് സിവിൽ സർവിസ്​ ആഗ്രഹം ഉദിച്ചത്. 2016ൽ തിരുവനന്തപുരം സിവിൽ സർവിസ് അക്കാദമിയിൽ ചേർന്നു. ആദ്യ രണ്ട്​ ശ്രമത്തിലും ഇന്ത്യൻ റവന്യൂ സർവീസി (ഐ.ആർ.എസ്)ലാണ്​ ഇടംപിടിച്ചത്​. 2018 ലാണ്​ ഐ.എ.എസ്​ ലഭിക്കുന്നത്​. മഹാരാഷ്ട്ര കാഡറിലായിരുന്നു നിയമനം. യവദ്മാൾ ജില്ലയിൽ അസി. കലക്ടറായിട്ടാണ്​ തുടക്കം. നിലവിൽ ചന്ദ്രപൂർ ജില്ലയിലെ ജില്ല പരിഷത്തിന്‍റെ ചീഫ് എക്സിക്യൂട്ടിവ് ഓഫിസറായി (സി.ഇ.ഒ) സ്ഥലം മാറ്റം ലഭിച്ചു. ഭാര്യ: മഞ്ജു അന്ന. മകൾ: ഹെലന. സഹോദരിമാർ: നീതു ജോൺസൻ, ജിനു ജോൺസൺ, ക്രിസ്റ്റി ജോൺസൺ.