കൊണ്ടോട്ടി ആര്‍.ടി.ഒ: വാഹന നമ്പർ ലേലത്തിൽ ക്രമക്കേടെന്ന്

മലപ്പുറം: കൊണ്ടോട്ടി ആര്‍.ടി ഓഫിസിന് കീഴില്‍ കഴിഞ്ഞ ദിവസം നടന്ന വാഹന നമ്പർ ലേലത്തിൽ ക്രമക്കേട് നടന്നതായി ഗതാഗത മന്ത്രിക്ക് പരാതി നൽകി. ലേലത്തില്‍ പങ്കെടുത്ത തറയിട്ടാല്‍ അബ്​ദുല്‍ റഊഫാണ് പരാതിക്കാരൻ.

സെർവർ തകരാറി​െൻറ പേരില്‍ ലേലം അസമയത്ത് അവസാനിപ്പിച്ചെന്നും തനിക്ക്​ തുക ഉയര്‍ത്തി വിളിക്കാന്‍ അവസരം നൽകിയില്ലെന്നും റഊഫ് വാർത്തസമ്മേളനത്തിൽ ആരോപിച്ചു. നിയമപരമായി തുക കൂട്ടി വിളിക്കുകയാണെങ്കില്‍ ആറു മിനിറ്റ്​ കൂടുതല്‍ സമയം അനുവദിക്കും.

എന്നാല്‍, ഇതില്‍ തനിക്ക് ആനുകൂല്യം ലഭിച്ചില്ല. ക്രമക്കേട് നടന്നിട്ടുണ്ടെങ്കില്‍ കുറ്റക്കാര്‍ക്കെതിരെ നടപടി വേണമെന്നും നമ്പര്‍ പുനര്‍ലേലം ചെയ്യണമെന്നും റഊഫ് ആവശ്യപ്പെട്ടു. കെ.എല്‍ 84- 0001 എന്ന നമ്പർ 9,01,000 രൂപക്കാണ് കഴിഞ്ഞ ദിവസം ലേലത്തിൽ പോയത്.