കേൾക്കേണ്ടതാണ്, കേൾവിക്കുറവുള്ള ധീരജിന്‍റെ ഉജ്ജ്വല വിജയം

നിലമ്പൂർ: പരിമിതിയെ തോൽപ്പിച്ച് ധീരജ് നേടിയ വിജയത്തിന് സ്ഫടിക തിളക്കമുണ്ട്. കേൾവിക്കുറവിനെയും മൂകതയെയും തോൽപ്പിച്ചാണ് ധീരജിന്‍റെ ഉജ്ജ്വല വിജയം. നിലമ്പൂർ വല്ലപ്പുഴയിലെ ബഡ്സ് സ്കൂൾ ഫോർ ദി ഹിയറിങ് ഇംപയേർഡിലെ സ്പെഷ‍ൽ സ്കൂളിലെ ഈ വിദ‍്യാർഥി എല്ലാ വിഷയങ്ങൾക്കും എ പ്ലസ് നേടി തന്‍റെ പരിമിതി ബുദ്ധിയെ ബാധിച്ചിട്ടില്ലെന്ന് തെളിയിച്ചു.

എല്ലാ വിഷയങ്ങൾക്കും എ പ്ലസ് നേടിയ ജില്ലയിലെ ആറ് സ്പെഷൽ സ്കൂളിലെ ഏക വിദ‍്യാർഥിയും ധീരജ് തന്നെയാണ്. ഇത്തവണ ഒമ്പത് പേരെ പരീക്ഷക്കിരുത്തിയ വല്ലപ്പുഴ ബഡ്സ് സ്കൂളിന് പത്താം തവണയും തുടർച്ചയായി നൂറ് ശതമാനം വിജയമാണ്. ഈ മധുരത്തിലേക്കാണ് ഇരട്ടി മധുരവുമായി ധീരജിന്‍റെ വിജയ തിളക്കം.

കമ്പ‍്യൂട്ടർ എൻജിനീയറാവുകയെന്നതാണ് ധീരജിന്‍റെ സ്വപ്നം. നല്ലംതണ്ണി മുതിരിയിലെ മുല്ലപ്പള്ളി ഗിരീഷ്-ജയശ്രീ ദമ്പതികളുടെ മകനാണ്. വ‍്യാഴാഴ്ച സ്കൂളിലെത്തിയ ധീരജിനെ പ്രധാനാധ‍്യാപിക എൻ.സി. സുഹ്റ ബീവിയുടെ നേതൃത്വത്തിൽ അധ‍്യാപകരും വിദ‍്യാർഥികളും രക്ഷിതാക്കളും ചേർന്ന് മധുരം നൽകി സ്വീകരിച്ചു.