ഒലിപ്പുഴയിൽ വീണ്ടും മലവെള്ളപ്പാച്ചിൽ

കരുവാരകുണ്ട്: ശനിയാഴ്ചയും ഒലിപ്പുഴയിൽ മലവെള്ളപ്പാച്ചിൽ. മലയോരത്ത് കനത്ത മഴ പെയ്തതാണ് കാരണം. അതേസമയം, നാട്ടിൽ മഴയില്ലായിരുന്നു. നിനച്ചിരിക്കാതെ പുഴ നിറഞ്ഞതോടെ പുഴയോര കുടുംബങ്ങളിൽ ആശങ്ക പരന്നു.

കേരളാംകുണ്ട് വിനോദസഞ്ചാരകേന്ദ്രത്തിൽ ശനിയാഴ്ച ഉച്ചക്ക് രണ്ടോടെ ഭീതിദമായ രൂപത്തിലാണ് ജലപ്രവാഹമുണ്ടായത്. ഇതോടെ സമൂഹ മാധ്യമങ്ങൾ വഴി കുടുംബങ്ങൾക്ക് മുന്നറിയിപ്പ് നൽകുകയായിരുന്നു. ഒലിപ്പുഴ നിറഞ്ഞൊഴുകിയെങ്കിലും കാര്യമായ നാശങ്ങളൊന്നുമുണ്ടായില്ല.