ഒറ്റക്ക് താമസിക്കുന്ന വയോധികയെ വീട്ടിൽ കയറി അക്രമിച്ചയാൾ പിടിയിൽ

പെരിന്തൽമണ്ണ: അങ്ങാടിപ്പുറത്ത് ഒറ്റക്ക് താമസിക്കുന്ന വയോധികയെ വീട്ടിൽ കയറി അക്രമിച്ച് പരിക്കേൽപിച്ച സംഭവത്തിൽ യുവാവ്​ അറസ്​റ്റിൽ. കാളികാവ് അടക്കാകുണ്ട് ഞാറക്കൽ അമീൻ സാദിഖാണ്​ (33) അറസ്​റ്റിലായത്​.

നവംബർ എട്ടിന് വൈകീട്ടായിരുന്നു സംഭവം. വെള്ളം ചോദിച്ചെത്തിയ പ്രതി നടത്തിയ അക്രമത്തിൽ തലക്കും കഴുത്തിനും മാരകമായി പരിക്കേറ്റ പരാതിക്കാരിക്ക് ബോധം നഷ്​ടപ്പെട്ടിരുന്നു. അടുത്തദിവസം വീട്ടിലെ ജോലിക്കാരി എത്തിയപ്പോഴാണ് വിവരം പുറത്തറിഞ്ഞത്​.

പ്രതിക്ക് കാലിന് ചെറിയ മുടന്തുപോലെ കണ്ടതായി പരാതിക്കാരി മൊഴി നൽകിയിരുന്നു. നാലുദിവസം തുടർച്ചയായി നൂറോളം സി.സി ടി.വി ദൃശ്യങ്ങൾ പരിശോധിച്ചും രാത്രി ടൗണിലെ റോഡോരത്ത്​ കിടക്കുന്നവരെയും മറ്റും പരിശോധിച്ചാണ് പ്രതിയിലേക്കെത്തിയത്. ഒരു കാൽ മുറിച്ചുമാറ്റി കൃത്രിമക്കാൽ ഉപയോഗിക്കുന്ന പ്രതിക്ക്​ സ്ഥിരമായി താമസസ്ഥലമോ മൊബൈൽ നമ്പറോ ഇല്ല.

ഇയാളെ അങ്ങാടിപ്പുറത്തുനിന്നാണ്​ കണ്ടെത്തിയത്​. ആദ്യം കുറ്റം നിഷേധിച്ച പ്രതി തെളിവുകൾ നിരത്തിയുള്ള ചോദ്യം ചെയ്യലിൽ കുറ്റം സമ്മതിച്ചു.

ഭിക്ഷാടനത്തിലൂടെ പണം കണ്ടെത്തുന്ന ഇയാൾ ലഹരിക്കടിമയാണ്. പെരിന്തൽമണ്ണ, കോഴിക്കോട് കസബ, തൃശൂർ എക്സൈസ്, മഞ്ചേരി സ്​റ്റേഷനുകളിൽ അടിപിടിക്കേസുകളും കഞ്ചാവുകേസുകളും നിലവിലുണ്ട്. ജയിൽ ശിക്ഷയനുഭവിച്ച് പുറത്തിറങ്ങിയതാണ്.

പെരിന്തൽമണ്ണ എ.എസ്.പി എം. ഹേമലതയുടെ നേതൃത്വത്തിൽ ഇൻസ്പെക്​ടർ സി.കെ. നാസർ, എസ്.ഐ രമാദേവി എന്നിവരടങ്ങുന്ന സംഘമാണ് അറസ്​റ്റ്​ ചെയ്​തത്. ജില്ല ആൻറി നർക്കോട്ടിക് സ്ക്വാഡിലെ ടി. ശ്രീകുമാർ, എൻ.ടി. കൃഷ്​ണകുമാർ, എം. മനോജ്​കുമാർ, അഡീഷനൽ എസ്.ഐ ജിജോ, എ.എസ്.ഐ സുകുമാരൻ, പ്രഫുൽ, കബീർ എന്നിവരാണ് അന്വേഷണ സംഘത്തിലുണ്ടായിരുന്നത്.