ജില്ലയിലെ പാതിവില തട്ടിപ്പ്​; ക്രൈംബ്രാഞ്ച്​ അ​ന്വേഷണം തുടങ്ങി

മലപ്പുറം: പാതിവില തട്ടിപ്പിൽ ജില്ലയിൽ രജിസ്റ്റർ ചെയ്ത കേസുകളിൽ ക്രൈംബ്രാഞ്ച്​ അന്വേഷണം തുടങ്ങി. ക്രൈംബ്രാഞ്ച്​ ഏറ്റെടുത്ത പത്തോളം കേസുകളിലാണ്​ പ്രഥമിക അന്വേഷണം ആരംഭിച്ചത്. ക്രൈംബ്രാഞ്ചിന്​ കൈമാറി കിട്ടിയ കേസുകളുടെ പുതിയ എഫ്​.ഐ.ആർ കോടതിയിൽ സമർപ്പിച്ചു. അന്വേഷണം ഏറ്റെടുത്ത റിപ്പോർട്ടും ഉടനെ കൈമാറും. ​വിവിധ സ്​​റ്റേഷനുകളിൽ രജിസ്റ്റർ ചെയ്ത കേസുകൾ വ്യത്യസ്​ത ഉദ്യോഗസ്ഥരുടെ കീഴിലാണ്​ അന്വേഷിക്കുന്നത്​. പ്രാഥമിക അന്വേഷണത്തിന്‍റെ ഭാഗമായി പണം കൈപ്പറ്റിയ എൻ.ജി.ഒ സംഘങ്ങളുടെ ബാങ്ക്​ ഇടപാടുകൾ പൊലീസ്​ പരിശോധിക്കുന്നുണ്ട്​.

പണം നൽകിയവരുടെ കൈവശമുള്ള രേഖകളും പൊലീസ്​ ​ശേഖരിക്കുന്നുണ്ട്​. പെരിന്തൽമണ്ണയിലെയും നിലമ്പൂരിലെയും ആറ്​ കേസുകൾ ക്രൈം ബ്രാഞ്ച്​ ഡി.വൈ.എസ്​.പിയുടെ നേതൃത്വത്തിലാണ്​ അന്വേഷിക്കുന്നത്​. മറ്റു കേസുകൾ ക്രൈം ബ്രാഞ്ച് ഇകോണമിക്​​ ഒഫൻസ്​ വിങും അന്വേഷിക്കും. ​പെരിന്തൽമണ്ണ സ്​റ്റേഷനിലെ നജീബ്​ കാന്തപുരം എം.എൽ.എക്കെതിരെയുള്ള കേസിൽ പരാതി പിൻവലിച്ചതിനാൽ ആ കേസിൽ അന്വേഷണം തുടങ്ങിയിട്ടില്ല. ഈ കേസിൽ ഇനി കോടതി നിർദേശ പ്രകാരമാകും തുടർനടപടി. ജില്ലയിലെ ബാക്കിയുള്ള കേസുകൾകൂടി ​ക്രൈംബ്രാഞ്ചിന്​ കൈമാറാനുള്ള നപടിക്രമങ്ങൾ പുരോഗമിക്കുകയാണ്. ക്രൈം ബ്രാഞ്ചിൽ മതിയായ ഇദ്യോഗസ്ഥരില്ലാത്ത സാഹചര്യത്തിൽ ലോക്കൽ സ്​റ്റേഷനുകളിൽ നിന്നും​ മറ്റു വിങ്ങുകളിൽ നിന്നും ഉദ്യോഗസ്ഥരെ ഉൾ​പ്പെടുത്തി അന്വേഷണം നടത്താനാണ്​ നിർദേശം.

ജില്ലയിലെ വിവിധ സ്​റ്റേഷനുകളിലായി മാർച്ച്​ നാല്​ വരെയുള്ള കണക്കുകൾ പ്രകാരം 42 കേസുകളാണ്​ പൊലീസ്​ രജിസ്റ്റർ ചെയ്തത്​. ഭൂരിഭാഗം സ്​​റ്റേഷനിലും നൂറോളം പരാതിക്കാരുണ്ട്​. ഇനിയും പരാതിക്കാർ വരാൻ സാധ്യതയുള്ളതിനാൽ നിലവിൽ രജിസ്റ്റർ ചെയ്ത കേസുകളിലേക്ക്​ ഉൾപ്പെടുത്താനാണ്​ തീരുമാനം. ഒ​രേ വ്യക്തിക്കോ സ്ഥാപനത്തിനോ എതിരെയുള്ള പരാതികൾ ഒരുമിച്ച്​ രേഖപ്പെടുത്തി ഒറ്റ കേസായാണ്​ രജിസ്റ്റർ ചെയ്യുന്നത്​. സംസ്ഥാനത്തെ വിവിധ ജില്ലകളിലായി 14814 പരാതികളാണ്​ ലഭിച്ചിട്ടുള്ളത്​. സംസ്ഥാനത്തൊട്ടാകെ 48523 പേരിൽ നിന്നും പാതിവിലക്ക്​ സ്കൂട്ടർ നൽകാമെന്ന്​ വാഗ്ദാനം ചെയ്ത 17087 പേർക്ക്​ മാത്രമാണ്​ വാഹനം നൽകിയത്​. ലാപ്​ടോപ്പിന്​ പണം വാങ്ങിയ 36891 പേരിൽ 29897 പേർക്കും തയ്യൽ മെഷീന്​ പണം നൽകിയ 56082 പേരിൽ 53478 പേർക്കും മാത്രമേ നൽകിയിട്ടുള്ളു. ഏകേദേശം 230കോടിയുടെ തട്ടിപ്പാണ്​ നടന്നതെന്ന്​ കഴിഞ്ഞ ദിവസം മുഖ്യമന്ത്രി പിണറായി വിജയൻ നിയമസഭയിൽ വ്യക്തമാക്കിയിരുന്നു. നിലവിൽ അഞ്ച്​ പേരെയാണ്​​ കേസുമായി അറസ്റ്റ്​ ചെയ്​തത്​.