എം.ഡി.എം.എയും കഞ്ചാവുമായി യുവാക്കൾ അറസ്റ്റിൽ

തിരൂർ: എം.ഡി.എം.എയും കഞ്ചാവുമായി കോട്ടക്കൽ സ്വദേശികളായ രണ്ട് യുവാക്കളെ എക്സൈസ് സംഘം അറസ്റ്റ് ചെയ്തു. കോട്ടക്കൽ പറപ്പൂർ മാളിയേക്കൽ അനൂബുൾ ബിസമിൻ (27), കോട്ടക്കൽ കെ.എൻ ബസാർ പരിയാടത്ത് ജിഫ്നാൻ (23) എന്നിവരെയാണ് 5.420 ഗ്രാം എം.ഡി.എം.എയും 10 ഗ്രാം കഞ്ചാവും വലിക്കാനുള്ള ഉപകരണവും 1700 രൂപയുമടക്കം തിരൂർ എക്സൈസ് സി.ഐ ജിജു ജോസും സംഘവും അറസ്റ്റ് ചെയ്തത്.

രഹസ്യവിവരത്തെ തുടർന്ന് ചൊവ്വാഴ്ച പുലർച്ച 2.30ന് കോട്ടക്കലിലെ സ്വകാര്യ അപ്പാർട്മെൻറിലെ പ്രതികളുടെ മുറിയിൽ നടത്തിയ പരിശോധനയിലാണ് മയക്കുമരുന്നുകൾ പിടിച്ചെടുത്തത്. പ്രതികളെ റിമാൻഡ് നടപടികൾക്കായി കുറ്റിപ്പുറം റേഞ്ചിന് കൈമാറി. കൂടുതൽ അന്വേഷണങ്ങൾക്കായി സി.ഐയെ ചുമതലപ്പെടുത്തി.