കുടുംബശ്രീ കലാജാഥക്ക് തുടക്കം

പാലക്കാട്: ഇന്‍ഫര്‍മേഷന്‍ പബ്ലിക് റിലേഷന്‍സ് വകുപ്പ് കുടുംബശ്രീയുടെ സഹകരണത്തോടെ ജില്ലയിൽ നടപ്പാക്കിയ വികസന-ക്ഷേമ പ്രവർത്തനങ്ങൾ പ്രമേയമാക്കി രംഗശ്രീയുടെ നേതൃത്വത്തിൽ സംഘടിപ്പിച്ച കലാജാഥക്ക് തുടക്കം. വടക്കഞ്ചേരി മന്ത മൈതാനത്ത് നടന്ന പരിപാടി ഗ്രാമപഞ്ചായത്ത് പ്രസിഡന്‍റ്​ ലിസി സുരേഷ് ഉദ്ഘാടനം ചെയ്തു. രംഗശ്രീയുടെ 12 കലാകാരികള്‍ അണിനിരന്ന കലാജാഥയില്‍ നാടകവും നൃത്തവും അരങ്ങേറി. ജില്ലയിലെ വിവിധ മണ്ഡലങ്ങളിൽ പര്യടനം നടത്തുന്ന കലാജാഥ ഈ മാസം 19ന് തൃത്താലയിൽ അവസാനിക്കും. ചടങ്ങിൽ കുടുംബശ്രീ ജില്ല മിഷൻ കോഓഡിനേറ്റർ പി. സൈതലവി, അസിസ്റ്റന്‍റ്​ ഇൻഫർമേഷൻ ഓഫിസർ കെ. സുമ, ജില്ല പ്രോഗ്രാം മാനേജർ നിഷിദ സൈബൂനി എന്നിവർ സംസാരിച്ചു.