ഹിന്ദുത്വത്തിന്​ തണൽ കോർപറേറ്റുകൾ -എ. വിജയരാഘവൻ

പാലക്കാട്​: ​രാജ്യത്ത്​ ബി.ജെ.പിക്ക്​ തീ​വ്ര വംശീയ, വർഗീയ ​പൊതുഅന്തരീക്ഷം സൃഷ്ടിക്കാൻ സഹായിക്കുന്നത്​ കോർപറേറ്റ്​ മുതലാളിമാരെന്ന്​ അഖിലേന്ത്യ കർഷക തൊഴിലാളി യൂനിയൻ പ്രസിഡന്‍റ്​ എ. വിജയരാഘവൻ. കെ.എസ്​.കെ.ടി.യു സംസ്ഥാന പ്രതിനിധി സമ്മേളനം ഉദ്​ഘാടനം ചെയ്യുകയായിരുന്നു അദ്ദേഹം. കുത്തക മുതലാളിമാരുടെ പിന്തുണ ഇല്ലായിരുന്നെങ്കിൽ തീവ്രഹിന്ദുത്വത്തിന്​ ഇത്ര വലിയ സ്വീകാര്യത ലഭിക്കുമായിരുന്നില്ല. വർഗീയതക്ക്​ നൽകുന്ന പിന്തുണക്ക്​ പകരമായി അദാനി-അംബാനി പോലുള്ളവർക്ക്​ കേന്ദ്രസർക്കാർ, രാജ്യം വീതംവെച്ചുകൊടുക്കുന്നു. കോർപറേറ്റ്​ കൊള്ളയും അതിവേഗത്തിലെ ദാരിദ്ര്യവത്​കരണവുമാണ്​ രാജ്യത്ത്​ അരങ്ങേറുന്നത്​. ഇതിനെതിരെ ഉയർന്നുവരുന്ന പ്രതിഷേധങ്ങൾ ഇല്ലാതാക്കാനാണ്​ ഹിന്ദുത്വശക്തികൾ സാധാരണക്കാരിൽ വർഗീയത കുത്തിവെക്കുന്നത്​. ന്യൂനപക്ഷ വിദ്വേഷം പൊതുബോധമായി സൃഷ്ടിച്ചെടുക്കാൻ കൊണ്ടുപിടിച്ച നീക്കങ്ങളാണ്​ നടക്കുന്നത്​. ഹിജാബ്​ എന്നും ഹലാൽ എന്നുമുള്ള വാക്കുകൾ ഒരോദിവസവും നാടിനെ വർഗീയവത്​കരിക്കാൻ ഉപയോഗിക്കുകയാണ്​. രാമനവമിയും ഹനുമാൻ ജയന്തിയും മറ്റുമത വിഭാഗങ്ങളിൽ ഭയാശങ്ക സൃഷ്ടിക്കുന്ന ദിനങ്ങളായി മാറപ്പെട്ടു. ഓരോ ദിവസവും സ്ഥലനാമങ്ങൾ മാറ്റി എഴുതുന്നു. പുതിയ മുസ്​ലിം ദേവാലയങ്ങളെ ആക്രമിക്കു​ന്നെന്നും എ. വിജയരാഘവൻ പറഞ്ഞു.