മാല മോഷ്ടിച്ച തൂത സ്വദേശി പിടിയിൽ

ചെറുതുരുത്തി: ചെറുതുരുത്തി വെട്ടിക്കാട്ടിരി വാഴയിൽ വീട്ടിൽ സിന്ധുവിന്‍റെ മാല മോഷ്ടിച്ച പ്രതിയെ പിടികൂടി. ചെർപുളശ്ശേരി തൂത സ്വദേശി താഴത്തേതിൽ വീട്ടിൽ മുബഷീറിനെയാണ് (27) ചെറുതുരുത്തി പൊലീസ് പിടികൂടിയത്. ബുധനാഴ്ച വൈകുന്നേരമാണ്​ സംഭവം. വെട്ടിക്കാട്ടിരിയിൽ തയ്യൽകട നടത്തുന്ന സിന്ധുവിന്‍റെ കടയിലെത്തി തയ്യലിന്‍റെ വിവരങ്ങൾ ചോദിച്ചറിയാനെന്ന വ്യാജേന സംസാരിക്കുന്നതിനിടെയാണ് മാല പൊട്ടിച്ച് ഓടാൻ ശ്രമിച്ചത്​. പിടിവലിയിൽ സിന്ധുവിനെ കഴുത്തിന്​ പരിക്കേറ്റു. സിന്ധു ഒച്ച വെച്ച് കരഞ്ഞെങ്കിലും സമീപത്തെ കടയിലൊന്നും ആരുമില്ലായിരുന്നു. ചെറുതുരുത്തി പൊലീസിന്‍റെ കൃത്യമായ ഇടപെടൽ മൂലം പ്രതിയെ ഉടൻ പിടികൂടാനായി. കഴിഞ്ഞ ദിവസം ഷൊർണൂരിൽ നിന്ന്​ മോഷ്ടിച്ച KL - 51, H, 2964 എന്ന സ്കൂട്ടർ ഉപയോഗിച്ചാണ് പ്രതി മാല മോഷണത്തിനെത്തിയത്. പരാതിക്കാരിയെ സ്റ്റേഷനിൽ വിളിച്ചുവരുത്തി മാല തിരിച്ചേൽപ്പിക്കാൻ നടപടി സ്വീകരിച്ചു.