നെല്ലിപ്പുഴ-ആനമൂളി റോഡില്‍ യാത്ര ദുസ്സഹം

മ​ണ്ണാ​ര്‍ക്കാ​ട്: ത​ക​ർ​ന്ന് കു​ഴി​ക​ൾ നി​റ​ഞ്ഞ നെ​ല്ലി​പ്പു​ഴ-​ആ​ന​മൂ​ളി റോ​ഡി​ല്‍ യാ​ത്ര ദു​സ്സ​ഹം. മ​ഴ മാ​റി​നി​ന്ന ഒ​രാ​ഴ്ച മു​മ്പു​വ​രെ റോ​ഡി​ല്‍ പൊ​ടി​ശ​ല്യ​മാ​യി​രു​ന്നു. നി​ല​വി​ല്‍ രൂ​പ​പ്പെ​ട്ട വ​ലി​യ കു​ഴി​ക​ളി​ൽ ചെ​ളി​വെ​ള്ളം കെ​ട്ടി​നി​ല്‍ക്കു​ന്ന​തി​നാ​ൽ വാ​ഹ​ന​യാ​ത്ര ദു​രി​ത​മാ​ണ്. ഇ​രു​ച​ക്ര​വാ​ഹ​ന യാ​ത്ര​ക്കാ​രാ​ണ് ഏ​റെ പ്ര​യാ​സം അ​നു​ഭ​വി​ക്കു​ന്ന​ത്. വ​ലി​യ വാ​ഹ​ന​ങ്ങ​ള്‍ ക​ട​ന്നു​പോ​കു​മ്പോ​ള്‍ ദേ​ഹ​ത്തേ​ക്ക് ചെ​ളി​വെ​ള്ളം തെ​റി​ക്കു​ന്ന​തി​ന് പു​റ​മെ കു​ഴി​ക​ളി​ൽ ചാ​ടി​യു​ള്ള അ​പ​ക​ട​ങ്ങ​ളും പ​തി​വാ​ണെ​ന്ന് നാ​ട്ടു​കാ​ര്‍ പ​റ​യു​ന്നു. നെ​ല്ലി​പ്പു​ഴ മു​ത​ല്‍ മ​ണ​ല​ടി, വെ​ള്ളാ​രം​കു​ന്ന്, തെ​ങ്ക​ര ഭാ​ഗ​ങ്ങ​ളി​ലാ​ണ് കൂ​ടു​ത​ൽ ദു​രി​തം.

റോ​ഡി​ല്‍ കു​ഴി​ക​ളി​ല്ലാ​ത്ത ഭാ​ഗ​ങ്ങ​ളി​ല്ല എ​ന്ന​താ​ണ് അ​വ​സ്ഥ. വ​ലി​യ വാ​ഹ​ന​ങ്ങ​ള്‍ക്കും വേ​ഗ​ത കു​റ​ച്ചേ സ​ഞ്ച​രി​ക്കാ​നാ​വൂ. നെ​ല്ലി​പ്പു​ഴ-​ആ​ന​മൂ​ളി റോ​ഡി​ല്‍ ടാ​റി​ങ് പ്ര​വൃ​ത്തി ക​ഴി​ഞ്ഞ ആ​ഴ്ച പു​ന​രാ​രം​ഭി​ക്കാ​നാ​യി​രു​ന്നു കേ​ര​ള റോ​ഡ് ഫ​ണ്ട് ബോ​ര്‍ഡ് (കെ.​ആ​ര്‍.​എ​ഫ്.​ബി) അ​ധി​കൃ​ത​രു​ടെ നീ​ക്കം. എ​ന്നാ​ല്‍ മ​ഴ വീ​ണ്ടും തു​ട​ങ്ങി​യ​തോ​ടെ പ്ര​വൃ​ത്തി നീ​ട്ടി​വെ​ച്ചു. കു​ഴി​ക​ളു​മു​ള്ള റോ​ഡി​ല്‍ ഇ​നി ടാ​റി​ങ് ന​ട​ത്ത​ണ​മെ​ങ്കി​ല്‍ ഒ​രി​ക്ക​ല്‍ കൂ​ടി വെ​റ്റ​മി​ക്സ് മെ​ക്കാ​ഡ​മി​ട്ട് ഉ​പ​രി​ത​ലം പ​രു​വ​പ്പെ​ടു​ത്തേ​ണ്ട​തു​ണ്ട്. മ​ഴ പെ​യ്താ​ല്‍ മി​ശ്രി​തം ഒ​ഴു​കി​പ്പോ​കു​മെ​ന്ന​തി​നാ​ലാ​ണ് നി​ല​വി​ല്‍ ഈ ​പ്ര​വൃ​ത്തി ന​ട​ത്താ​ന്‍ അ​ധി​കൃ​ത​ര്‍ തു​നി​യാ​ത്ത​ത്. ര​ണ്ടാ​ഴ്ച മു​മ്പു​വ​രെ അ​സ​ഹ്യ പൊ​ടി​ശ​ല്യ​മാ​യി​രു​ന്നു അ​നു​ഭ​വ​പ്പെ​ട്ടി​രു​ന്ന​ത്. നാ​ട്ടു​കാ​രു​ടെ പ​രാ​തി​യെ തു​ട​ര്‍ന്ന് എ​ന്‍. ഷം​സു​ദ്ദീ​ന്‍ എം.​എ​ല്‍.​എ വി​ളി​ച്ച യോ​ഗ​ത്തി​ല്‍ ടാ​റി​ങ് ഉ​ട​ന്‍ ആ​രം​ഭി​ക്കു​മെ​ന്ന് അ​ധി​കൃ​ത​ര്‍ അ​റി​യി​ക്കു​ക​യും ചെ​യ്തു. എ​ന്നാ​ല്‍ കാ​ലാ​വ​സ്ഥ വീ​ണ്ടും പ്ര​തി​കൂ​ല​മാ​യ​തോ​ടെ നാ​ട്ടു​കാ​രു​ടെ യാ​ത്രാ​ക്ലേ​ശ​ത്തി​ന് അ​റു​തി​യി​ല്ലാ​താ​വു​ക​യാ​ണ്.

ക​ഴി​ഞ്ഞ വ​ര്‍ഷം ആ​ഗ​സ്റ്റി​ല്‍ ആ​രം​ഭി​ച്ച റോ​ഡ് ന​വീ​ക​ര​ണം ഈ ​വ​ര്‍ഷം ജൂ​ണി​ലാ​ണ് ടാ​റി​ങ്ങി​ലേ​ക്കെ​ത്തി​യ​ത്. തെ​ങ്ക​ര മു​ത​ല്‍ നെ​ല്ലി​പ്പു​ഴ ദാ​റു​ന്ന​ജാ​ത്ത് സ്‌​കൂ​ള്‍ വ​രെ 4.5 കി​ലോ​മീ​റ്റ​റി​ല്‍ ര​ണ്ടു കി​ലോ​മീ​റ്റ​ർ മാ​ത്ര​മാ​ണ് ആ​ദ്യ​പാ​ളി ടാ​റി​ങ് ന​ട​ത്തി​യ​ത്.