എ.എ.വൈ കാർഡുടമകൾക്ക് പയർ ധാന്യങ്ങൾ ലഭിച്ചില്ലെന്ന്

പട്ടാമ്പി: എ.എ.വൈ, പിങ്ക് കാർഡുടമകൾക്ക് കേന്ദ്ര സർക്കാർ നൽകുന്ന അഞ്ച്​ കിലോ ഭക്ഷ്യധാന്യങ്ങളുടെ കൂടെ ആഗസ്​റ്റ്​ മാസത്തിൽ നൽകുന്ന പയർ ധാന്യങ്ങൾ ലഭിച്ചില്ലെന്ന് ആക്ഷേപം. അഞ്ച്​ കിലോ അരിയും ഒരു കിലോ പയർ ധാന്യങ്ങളുമാണ്​ (കടല, ചെറുപയർ) ഓരോ കാർഡിനും വിതരണം ചെയ്യേണ്ടത്.

എന്നാൽ, ഇതുവരെ റേഷൻ കടകളിൽ പയർ ധാന്യങ്ങൾ എത്തിയിട്ടില്ലെന്നാണ് കടയുടമകൾ പറയുന്നത്. താലൂക്ക് സിവിൽ സപ്ലൈസ്​ ഓഫിസർമാർ പയർധാന്യങ്ങൾ എന്ന് വരുമെന്ന്​ അറിയാത്ത അവസ്ഥയിലുമാണ്. ആഗസ്​റ്റിലെ പയറും കടലയും ഇനി ലഭിക്കുമോ എന്ന ആശങ്കയിലാണ് എ.എ.വൈ, മുൻഗണനാ കാർഡുടമകൾ.

എല്ലാ മാസങ്ങളിലും ക്യത്യമായി അഞ്ച്​ കിലോ അരിയുടെ കൂടെ നൽകുന്ന ഒരു കിലോ പയർ ധാന്യങ്ങൾ ലഭിക്കാത്തത് സിവിൽ സപ്ലൈസ് വകുപ്പി​െൻറ അനാസ്ഥയാണെന്നും പാവങ്ങൾക്ക് കേന്ദ്ര സർക്കാർ റേഷൻ കടകൾ വഴി നൽകുന്ന ഭക്ഷ്യധാന്യങ്ങൾ കൃത്യമായി വിതരണം ചെയ്യുന്നതിൽ സംസ്ഥാന സിവിൽ സപ്ലൈസ് വകുപ്പി​െൻറ വീഴ്​ചക്ക്​ തെളിവാണ് ആഗസ്​റ്റിലെ പയർ ധാന്യങ്ങൾ വിതരണം ചെയ്യാൻ കഴിയാത്തതെന്നും കേരള ദലിത് ഫോറം സംസ്ഥാന നേതൃയോഗം ആരോപിച്ചു. സംസ്ഥാന പ്രസിഡൻറ്​ ചോലയിൽ വേലായുധൻ അധ്യക്ഷത വഹിച്ചു.

ഓൺലൈൻ യോഗത്തിൽ സംസ്ഥാന ഭാരവാഹികളായ രാജേന്ദ്രൻ മുതുതല, ബാബുരാജ് മരുത, രാധാകൃഷ്ണൻ കല്ലുവഴി, അശോകൻ കൊല്ലം, സുരേഷ് പുലാമന്തോൾ, എം. കുഞ്ഞൻ, സുരേഷ് മരുത, പി. പ്രസാദ്, സി.കെ. വിജയൻ എന്നിവർ സംസാരിച്ചു.