പഴയ കൊച്ചിപ്പാലം പൊളിച്ചുമാറ്റാൻ നടപടി തുടങ്ങി

ഷൊർണൂർ: ഷൊർണൂരിൽ ഭാരതപ്പുഴക്ക് കുറുകെയുള്ള പഴയ കൊച്ചിപ്പാലം പൂർണമായും പൊളിച്ചുമാറ്റാൻ അധികൃതർ നടപടികളാരംഭിച്ചു. ചരിത്ര സ്മാരകമായി നിലനിർത്തേണ്ട പാലം പൊളിച്ചുമാറ്റുന്നതിൽ പലർക്കും പ്രതിഷേധമുണ്ട്. നൂറ്റാണ്ടിലധികം പഴക്കമുള്ള ഈ പാലത്തിന് ഭാരതപ്പുഴക്ക് കുറുകെ നിർമിച്ച ആദ്യ പാലമെന്ന ഖ്യാതിയുണ്ട്. തിരുവിതാംകൂർ, കൊച്ചി ഭാഗങ്ങളെ മലബാറുമായി ബന്ധിപ്പിച്ചിരുന്ന ഏക പാലവുമായിരുന്നു. കൊച്ചി രാജാവായിരുന്ന രാമവർമ തമ്പുരാൻ സ്വർണം നൽകി സ്വരൂപിച്ച തുക നൽകിയാണ് ബ്രിട്ടീഷ് ഭരണകാലത്ത് ഈ പാലം നിർമിച്ചത്.

കരിങ്കൽ തൂണുകളാലും ഉരുക്ക് നിർമിത സ്പാനുകളാലും നിർമിച്ച പാലത്തിന്റെ നാല് സ്പാനുകൾ ഇതിനകം നിലംപൊത്തി. സ്പാനുകൾക്കൊന്നും കേടുപാടില്ല. അനിയന്ത്രിതമായി മണലെടുത്തതിന്റെ ഫലമായാണ് പാലത്തിന് ഈ അവസ്ഥ വന്നത്. തൂണുകളുടെ അടിത്തറ പുറത്ത് വരുകയും ശക്തമായ കുത്തൊഴുക്കിൽ കാലക്രമേണ കാലുകൾ തകരുകയുമായിരുന്നു. ആദ്യ തൂണ് തകർന്നപ്പോൾ തന്നെ പാലം പുരാവസ്തു വകുപ്പ് ഏറ്റെടുത്ത് ചരിത്രസ്മാരകമായി നിലനിർത്തണമെന്ന ആവശ്യം ഉയർന്നിരുന്നു.

45 ലക്ഷത്തോളം രൂപയുടെ ചെലവിലാണ് പൊളിച്ചുമാറ്റുന്നതെന്നറിയുന്നു. ഈ തുക ചെലവാക്കിയാൽ തൂണുകൾ ബലപ്പെടുത്തി പാലം പുനഃസ്ഥാപിക്കാനാകുമെന്ന് എൻജിനീയറിങ് വിദഗ്ധർ ചൂണ്ടിക്കാട്ടുന്നു. ഷൊർണൂർ റെയിൽവേ സ്റ്റേഷനരികിലാണ് ഈ പുഴയുള്ളത്.

കേരള കലാമണ്ഡലം, കേരളീയ ആയുർവേദ സമാജം, പഞ്ചകർമ ഇൻസ്റ്റിറ്റ്യൂട്ട് എന്നിവയൊക്കെ ഈ പാലത്തിനരികിലാണ്. സ്വാമി വിവേകാനന്ദൻ വന്നിറങ്ങിയ ഇവിടെ പ്രതിമയടക്കമുള്ള സ്മാരകവും വരാൻ പോവുകയാണ്. പുഴയുടെ സൗന്ദര്യം നുകരാൻ ദിനംപ്രതി നൂറുകണക്കിന് പേരാണ് കൊച്ചിപ്പാലത്തിന് സമീപമെത്തുന്നത്. ഇവയെല്ലാം ചേർത്ത് വിനോദ സഞ്ചാര കേന്ദ്രമാക്കാവുന്ന സാഹചര്യമുണ്ടായിരുന്നു.