വ്യാജമദ്യം കഴിച്ച്​ കഞ്ചിക്കോട്​ മൂന്ന്​ മരണം; ആറു പേര്‍ ആശുപത്രിയിൽ

വാളയാർ: കഞ്ചിക്കോടിന്​ സമീപം മായപള്ളത്ത്​ വിഷമദ്യ ദുരന്തമെന്ന്​ സൂചന. ഇവിടെ വ്യാജമദ്യം കഴിച്ച മൂന്ന്​ പേർ മരിച്ചു. മായംപള്ളം ആദിവാസി ​േകാളനിയിലെ മുരുകൻ (71), അയ്യപ്പൻ (70), ശിവകുമാർ (40) എന്നിവരാണ്​ മരിച്ചത്​. ദേഹാസ്വാസ്ഥ്യമുള്ള ഒരാൾ അടക്കം ആറ്​ പേരെ പാലക്കാട്​ ജില്ല ആശുപത്രിയിൽ പ്രവേശിപ്പിച്ചു.

ദേശീയപാതയിൽനിന്നും ഒരു കിലോമീറ്റർ ഉള്ളിലാണ്​ മായപള്ളം കോളനി. ശിവകുമാർ വ്യാജവാറ്റ്​ നടത്തുന്നയാളാണെന്ന്​ പറയുന്നു. കഴിഞ്ഞ വ്യാഴാഴ്​ച രാത്രിയാണ്​ ഇവർ വ്യാജമദ്യം കഴിച്ചത്​. ശിവകുമാർ കൊണ്ടുവന്ന മദ്യത്തിന്​ മണം വ്യത്യാസം തോന്നി ചുമട്ടു​െതാഴിലാളികൾ കുടിക്കാൻ വിസമ്മതിച്ചുവെ​ത്ര. മടക്കികൊണ്ടുപോയ ശിവകുമാർ, രാത്രി കോളനിയിലുള്ളവർക്ക്​ മദ്യം നൽകുകയായിരുന്നു.

രാത്രി തന്നെ ദേഹാസ്വാസ്ഥ്യം അനുഭവപ്പെട്ട മുരുകൻ വെള്ളിയാഴ്​ച രാവിലെ പത്തോടെ​ മരിച്ചു​. അയ്യപ്പൻ വെള്ളിയാഴ്​ച വൈകീട്ടും മരിച്ചു. രണ്ടുപേരും വീട്ടിൽവെച്ചാണ്​ മരിച്ചത്​. വാർധക്യസഹജ അസുഖങ്ങൾ ഉള്ളവർ ആയതിനാൽ വീട്ടുകാർക്ക്​ മരണത്തിൽ സംശയമൊന്നും തോന്നിയില്ല. മുരുകന്റെ മൃതദേഹം വെള്ളിയാഴ്​ചയും അയ്യപ്പ​േൻറത്​ ശനിയാഴ്​ചയും സംസ്‌കരിച്ചു.

ശിവകുമാറിന്​ ഞായറാഴ്​ച രാവിലെ ദേഹാസ്വസ്ഥ്യം അനുഭവപ്പെടുകയും രാത്രി ജില്ല ആശുപത്രിയിൽ മരിക്കുകയും ചെയ്​തതോടെയാണ്​ മരണകാരണം വ്യാജ മദ്യമാകാമെന്ന സംശയം ഉയർന്നത്​. ഇതേതുടർന്ന്​ ആരോഗ്യപ്രവർത്തകർ കോളനിയിലെ മദ്യപാന ശീലമുള്ള സ്​ത്രീകളേയും കുട്ടികളേയുമടക്കം ആശുപത്രിയിലാക്കി. ദേഹാസ്വസ്ഥ്യമുള്ള ഒരാളും ജില്ല ആശുപത്രിയിൽ അഡ്​മിറ്റുണ്ട്​. ഇയാളുടെ നില ഗുരുതരമല്ല.

പൊലീസും എക്​സൈസും ചേർന്ന്​ കോളനിയിലും പരിസരത്തും തിരച്ചിൽ നടത്തികൊണ്ടിരിക്കുകയാണ്​. വ്യാജവാറ്റുമായി ബന്ധമുണ്ടെന്ന്​ സംശയിക്കുന്ന കോളനിവാസികളിൽ ചിലരെ ചോദ്യം ചെയ്യാനായി വാളയാർ പൊലീസ്​ കസ്​റ്റഡിയിലെടുത്തു.