ചികിത്സ നൽകി കാട്ടിലേക്ക് വിട്ട മോഴയാന ​െചരിഞ്ഞു

അഗളി: അട്ടപ്പാടിയിൽ വനംവകുപ്പ് മയക്കുവെടിവെച്ച് ചികിത്സ നൽകി കാട്ടിലേക്ക് തിരികെവിട്ട മോഴയാന ​െചരിഞ്ഞു. ബുധനാഴ്​ച പുലർച്ച ഏഴോടെയാണ് ആന തമിഴ്നാട് അതിർത്തിക്ക്​ സമീപം ആനക്കട്ടി-ഷോളയൂർ റോഡിൽ മരപ്പാലം ഭാഗത്ത് റോഡരികിൽ ​െചരിഞ്ഞത്.

ഏറെ ക്ഷീണിച്ച ആന രണ്ടു ദിവസം മരപ്പാലം ഭാഗത്തുണ്ടായിരുന്നു. ബുധനാഴ്​ച പുലർച്ച ആറോടെ റോഡരികിലെത്തുകയും പിന്നീട് കിടക്കുകയുമായിരുന്നു. ഏഴ് മണിയോടെ ​െചരിഞ്ഞു. അട്ടപ്പാടിയിൽ ആദിവാസി വിഭാഗക്കാരുടെതടക്കം 24 വീടുകളാണ് ഈ ആന തകർത്തത്. ഒരു റേഷൻ കടയും പാൽ സൊസൈറ്റി ഗോഡൗണും ആക്രമണത്തിനിരയായി. ഏതാനും മാസങ്ങളായി ഷോളയൂർ ഭാഗത്ത് സജീവ സാന്നിധ്യമായിരുന്നു ഈ മോഴയാന. ശല്യം പതിവായപ്പോൾ പ്രദേശവാസികൾ ആനക്ക്​ 'ബുൾഡോസർ' എന്ന പേര്​ നൽകി.

ശല്യം തുടർന്നപ്പോൾ വനം വകുപ്പ് അധികൃതർ റേഡിയോ കോളർ ഘടിപ്പിക്കാനുള്ള അനുമതിക്കായി മേലധികൃതർക്ക് അപേക്ഷ നൽകി. ശല്യം രൂക്ഷമായപ്പോൾ റബ്ബർ ബുള്ളറ്റുപയോഗിച്ച് കാട്​ കയറ്റി. തുടർന്ന് ആന തമിഴ്നാട് വനത്തിലേക്ക് ചേക്കേറി. ഒരാഴ്ചക്കു ശേഷം തിരികെയെത്തിയത് താടിയെല്ല് തകർന്നും നാവ് മുറിഞ്ഞും ഗുരുതര പരിക്കുകളോടെയായിരുന്നു. തുടർന്ന്​ വനം വകുപ്പ് സീനിയർ വെറ്ററിനറി ഓഫിസർ അരുൺ സക്കറിയയുടെ നേതൃത്വത്തിൽ മയക്കുവെടിവെച്ച് മയക്കി വിദഗ്​ധ ചികിത്സ നൽകി വിട്ടു. എന്നാൽ, മോണയും താടിയെല്ലും തകർന്ന ആന ഭക്ഷണം കഴിക്കാനാകാതെ വീണ്ടും അലഞ്ഞു.

പിന്നീട്​, തമിഴ്നാട് ഭാഗത്ത്​ നിന്നെത്തിയ കൊമ്പനൊപ്പം തമിഴ്​നാട് ഭാഗത്തേക്ക് കടന്നു. വീണ്ടുമെത്തിയ ആനയുടെ ആരോഗ്യനില ഏറെ മോശമായിരുന്നു. അവശനിലയിലുണ്ടായിരുന്ന ആനയെ ജെ.സി.ബി.യുടെ സഹായത്തോടെ തമിഴ്നാട് അധികൃതർ കേരളത്തിലേക്ക് മലകയറ്റിവിടുകയായിരു​ന്നെന്നും ദേഹത്ത് കൂടുതൽ ക്ഷതങ്ങളുണ്ടായിരുന്നെന്നും പറയുന്നുണ്ട്. അതേസമയം, നിരവധി വീടുകൾ തകർത്തെങ്കിലും ആനയുടെ അന്ത്യം ആദിവാസി വിഭാഗത്തിന് വേദനയായി. പട്ട്​ പുതപ്പിച്ചും നിലവിളക്ക് കൊളുത്തിയും അവർ അന്ത്യകർമമൊരുക്കി. താടിയെല്ല് തകർന്നതിനാൽ റോഡിലൂടെ ആന കണ്ണീർ വാർത്ത് ദിവസങ്ങൾ നടന്നിരുന്നു. വനം വകുപ്പ് വെറ്ററിനറി ഓഫിസർ അരുൺ ഗോപിയുടെ നേതൃത്വത്തിൽ പോസ്​റ്റ്​മോർട്ടം നടപടി പൂർത്തിയാക്കി ജഡം സംസ്​കരിച്ചു.

മരണകാരണത്തിൽ ദുരൂഹത

അഗളി: ആനയുടെ മരണത്തിനിടയാക്കിയ കാരണവുമായി ബന്ധപ്പെട്ട ദുരൂഹതയേറുന്നു. ആനകൾ തമ്മിൽ സംഘർഷത്തിലേർപ്പെട്ടതാണ് നാവിനും മറ്റും മുറിവേൽക്കാനിടയാക്കിയതെന്നാണ് തമിഴ്നാട് വനംവകുപ്പ് അധികൃതർ പറയുന്നത്.എന്നാൽ, കൊമ്പുകളില്ലാത്ത മോഴയാന കൊമ്പനാനകളോട് പൊതുവെ ഏറ്റുമുട്ടലിലേർപ്പെടാറില്ലെന്നാണ് വിദഗ്​ധ അഭിപ്രായം. തമിഴ്നാട്ടിലെ ജനവാസ കേന്ദ്രങ്ങളിൽ നിന്നാണ് പരിക്കേതെന്നാണ് പ്രദേശവാസികൾ പറയുന്നത്.

കേരള അതിർത്തിയിലെ കോയമ്പത്തൂർ വനമേഖലയിൽ അടുത്തിടെ ദുരൂഹമായി ചരിഞ്ഞത് പതിനാറ് കാട്ടാനകളാണ്. സ്ഫോടകവസ്തു നൽകിയതാണ് മരണത്തിനിടയാക്കിയതെന്നും ആക്ഷേപമുണ്ട്.