കണ്ടെയ്​നർ നടപ്പാതയിലേക്ക് ഇടിച്ചുകയറി

തിരുവല്ല: തിരുവല്ല-അമ്പലപ്പുഴ സംസ്ഥാന പാതയിൽ തിരുവല്ല താലൂക്ക് ആശുപത്രിപ്പടിക്ക് സമീപം നിയന്ത്രണം നഷ്ടപ്പെട്ട കണ്ടെയ്​നർ ലോറി നടപ്പാതയിലേക്ക് ഇടിച്ചുകയറി. ആർക്കും പരിക്കില്ല. ആശുപത്രിപ്പടിയിലെ കുത്തനെയുള്ള ഇറക്കത്തിൽ തിങ്കളാഴ്ച പുലർച്ച ആറുമണിയോടെ ആയിരുന്നു അപകടം. തിരുവല്ല ഭാഗത്തുനിന്ന്​ മീൻ കയറ്റിവന്ന ആലപ്പുഴ മർവ ഫിഷേഴ്സി‍ൻെറ ഉടമസ്ഥതയിലുള്ള ലോറിയാണ് അപകടത്തിൽപ്പെട്ടത്. നടപ്പാതയുടെ കൈവരി തകർത്ത ലോറി സ്വകാര്യ വ്യക്തിയുടെ മതിലും ഇടിച്ചുതകർത്തു. മുൻവശത്തെ ടയർ പഞ്ചറായതാണ് അപകടകാരണമെന്ന് പൊലീസ് പറഞ്ഞു. ലോറിയുടെ മുൻവശം പൂർണമായും തകർന്നു.