പന്തളം നഗരസഭ ഭരണസമിതി രാജിവെക്കണം -യു.ഡി.എഫ്

പന്തളം: നഗരസഭയിലെ ബി.ജെ.പി ഭരണസമിതി രാജിവെക്കണമെന്ന്​ യു.ഡി.എഫ്. നഗരസഭ 2021-22 പദ്ധതിയിലെ കോടികൾ നഷ്ടപ്പെടുത്തിയെന്നും യു.ഡി.എഫ് ആരോപിച്ചു. നഗരസഭ 2021-22 പദ്ധതി പ്രവർത്തനം മാർച്ച് 31ന് അവസാനിപ്പിച്ചപ്പോൾ വിവിധ മേഖലകളിൽ കോടിക്കണക്കിന് രൂപയാണ് നഷ്ടപ്പെടുത്തിയത്. മെയിന്‍റനൻസ് ഗ്രാന്‍റിൽ മാത്രം 1.26കോടി രൂപ സ്പിൽ ഓവർ ആക്കിയതിലൂടെ 80 ശതമാനം തുകയും നഷ്ടപ്പെടുത്തി. നോൺ റോഡ് മെയിന്‍റനൻസിലും 37 ലക്ഷം രൂപ സ്പിൽ ഓവർ ആക്കിയിരിക്കുന്നു. പ്ലാൻ ഫണ്ടുൾപ്പെടെ കോടിക്കണക്കിന് രൂപയാണ് നഗരസഭയിൽ തനതു വർഷം നടത്തേണ്ട പദ്ധതികളിൽ നഷ്ടപ്പെടുത്തിയത്​. ഉൽപാദന മേഖലയിൽ 37 ശതമാനവും സേവന മേഖലയിലും പൊതുമരാമത്ത് മേഖലയിലും 56 ശതമാനവും മാത്രമാണ് ചെലവാക്കിയത്. തനതുവർഷം വ്യക്തിഗത ആനുകുല്യങ്ങൾ പാവപ്പെട്ടവന് നൽകാൻപോലും കഴിയാത്ത അവസ്ഥയാണ്. ഭരണം ഏറ്റെടുത്ത നാൾ മുതൽ അഴിമതിയും ധൂർത്തും നടത്തി തനതുഫണ്ടും ഇല്ലാതാക്കി. ഇങ്ങനെ സമസ്ത മേഖലയിലും പരാജയപ്പെട്ട ചെയർപേഴ്സനും ഭരണസമിതിയും രാജിവെക്കണമെന്ന്​ യു.ഡി.എഫ് കൗൺസിലർമാരായ കെ.ആർ. വിജയകുമാർ, കെ.ആർ. രവി, പന്തളം മഹേഷ്, സുനിത വേണു, രത്നമണി സുരേന്ദ്രൻ എന്നിവർ ആവശ്യപ്പെട്ടു.