പൊലീസുകാരന്‍റെ കൈയ്യിൽ കടിച്ച് രക്ഷപെട്ട പ്രതി അപകടത്തിൽപ്പെട്ടു

തിരുവല്ല : പൊലീസുകാരന്‍റെ കൈയ്യിൽ കടിച്ച് രക്ഷപെട്ട പ്രതി പോലീസിനെ വെട്ടിച്ചു കടക്കുന്നതിനിടെ അപകടത്തിൽപ്പെട്ടു. അപകടത്തിൽ സാരമായി പരിക്കേറ്റ പ്രതിയെ കോട്ടയം മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു.

അയൽവാസിയെ വെട്ടിപ്പരിക്കേൽപ്പിച്ച കേസിൽ ഒളിവിലായിരുന്ന തിരുവല്ല കുളക്കാട് ദർശനയിൽ സ്റ്റാൺ വർഗീസാണ് അപകടത്തിൽ പെട്ടത്. വെള്ളിയാഴ്ച രാത്രി 12 മണിയോടെ തടിയൂരിൽ വെച്ചായിരുന്നു അപകടം.

ബൈക്കിലെത്തിയ സ്റ്റാൺ പോലീസ് പെട്രോളിങ്​ സംഘത്തെ കണ്ട് രക്ഷപെടാൻ ശ്രമിക്കുന്നതിനിടെ നിയന്ത്രണം വിട്ട് ബൈക്ക് മറിയുകയായിരുന്നു. പൊലീസ് ജീപ്പിലാണ് പ്രതിയെ മെഡിക്കൽ കോളേജ് ആശുപത്രിയിലെത്തിച്ചത്. മെഡിക്കൽ കോളേജിലെത്തി തിരുവല്ല പോലീസ് സ്റ്റാണിന്‍റെ അറസ്റ്റ് രേഖപ്പെടുത്തി.

സ്റ്റാണിന്‍റെ അയൽ വാസിയായ കുളക്കാട് മുണ്ടപ്പള്ളിത്തറയിൽ സനൽ ജോസിനെ വടിവാൾ ഉപയോഗിച്ച് വെട്ടിപ്പരിക്കേൽപ്പിച്ച കേസിൽ പാലിയേക്കരയിലെ വീട്ടിൽ ഒളിവിൽ കഴിയവേ അഞ്ചാം തീയതി വൈകിട്ടാണ് സ്റ്റാൺ പിടിക്കാനെത്തിയ പൊലീസ് സംഘത്തിലുൾപ്പെട്ട പോലീസുകാരന്‍റെ കൈയ്ക്ക് കടിച്ച ശേഷം രക്ഷപെട്ടത്.

കേസിൽ സ്റ്റാണിന്‍റെ സഹോദരൻ സ്റ്റോയി വർഗീസ്, കോട്ടത്തോട് പാറയിൽ വീട്ടിൽ സന്തോഷ് എന്നിവർ നേരത്തേ പിടിയിലായിരുന്നു.