അമിതവേഗം ചോദ്യം ചെയ്തതിന് വീട്ടിൽ കയറി മർദനം; നാലുപേർ അറസ്റ്റിൽ

പത്തനംതിട്ട: വാഹനം അമിതവേഗത്തിൽ പോയതിനെ ചൊല്ലിയുണ്ടായ തർക്കത്തെ തുടർന്ന്, വീട്ടിൽ കയറി ആക്രമണം നടത്തിയ കേസിൽ നാലുപേരെ കീഴ്‌വായ്‌പൂര് പൊലീസ് പിടികൂടി.

ഈമാസം ഏഴിന് രാത്രി 10.30നാണ് സംഭവം. കുന്നന്താനം ആഞ്ഞിലിത്താനത്ത് പഴമ്പള്ളി ആഞ്ഞിലിമൂട്ടിൽ വാടകക്ക് താമസിക്കുന്ന ശശികുമാറിന്റെ വീട്ടിൽ ആക്രമണം നടത്തിയ അഞ്ചുപേരിൽ നാലുപേരാണ് അറസ്റ്റിലായത്. മാമാട്ടി കവലയിലുള്ള കാവുങ്കൽ അയ്യപ്പക്ഷേത്രത്തിന് സമീപം വെച്ചുണ്ടായ തർക്കമാണ് ആക്രമണത്തിന് കാരണം.

രണ്ട് മുതൽ അഞ്ചുവരെ പ്രതികളാണ് പിടിയിലായത്. കവിയൂർ ആഞ്ഞിലിത്താനം പഴമ്പിള്ളി കൊച്ചുകുന്നക്കാട്ടിൽ കെ.കെ. ജയേഷ് (39), ചിറയക്കുളം മാവേലി കിഴക്കേക്കാലായിൽ രതീഷ് കുമാർ (39), മൈലക്കാട് മോനിഷ ഭവനിൽ മനീഷ് (25), മൈലക്കാട് ഞാറക്കലോടി വീട്ടിൽ ആംബ്രോസ് എന്ന ഹരികുമാർ (31) എന്നിവരെയാണ് പിടികൂടിയത്.

ഒന്നാം പ്രതിക്കായുള്ള തിരച്ചിൽ തുടരുകയാണ്. പ്രതികളെ കോടതിയിൽ ഹാജരാക്കി റിമാൻഡ് ചെയ്തു. പൊലീസ് ഇൻസ്‌പെക്ടർ വിപിൻ ഗോപിനാഥിന്റെ നേതൃത്വത്തിലാണ് അന്വേഷണം നടക്കുന്നത്.