കോന്നിയിൽനിന്നുള്ള ദീർഘദൂര കെ.എസ്.ആർ.ടി.സി ബസുകൾ മാർച്ച് ഒന്നു മുതൽ പുനരാരംഭിക്കും

കോന്നി: കോന്നിയിൽനിന്നുള്ള ദീർഘദൂര ബസ് സർവിസുകൾ മാർച്ച് ഒന്നിന് പുനരാരംഭിക്കുമെന്ന് മന്ത്രി ആന്‍റണി രാജു. കെ.യു. ജനീഷ് കുമാർ എം.എൽ.എ ബസ് സർവിസുകൾ നിലച്ചത് സംബന്ധിച്ച് നിയമസഭയിൽ ഉന്നയിച്ച ചോദ്യത്തിന് മറുപടി നൽകുകയായിരുന്നു മന്ത്രി.

കോവിഡിനെ തുടർന്ന് നിർത്തലാക്കിയ തണ്ണിത്തോട് പഞ്ചായത്തിലെ തണ്ണിത്തോട്ടിൽനിന്ന് ഗുരുവായൂരിലേക്കുള്ള സർവിസും കോട്ടയത്തുനിന്നുള്ള ആങ്ങമൂഴി സർവിസുമാണ് പുനരാരംഭിക്കുന്നത്.മലയോര മേഖലയിലെ ജനങ്ങളുടെ ആകെ ആശ്രയമായിരുന്ന ഈ ബസ് സർവിസുകൾ പുനരാരംഭിക്കുന്നതിലൂടെ സാധാരണക്കാരായ ജനങ്ങളുടെ ബുദ്ധിമുട്ടിന് പരിഹാരമാകും.