നിർത്തിയിട്ട കാറിന് തീ പിടിച്ചു

തിരുവല്ല: തിരുവല്ല ബൈപാസിൽ നിർത്തിയിട്ടിരുന്ന സ്കോർപ്പിയോ കാറിന് തീ പിടിച്ചു. വാഹനത്തിന്‍റെ എഞ്ചിൻ ഭാഗത്ത് ആളിപ്പടർന്ന തീ അഗ്നി ശമന സേനയെത്തി അണച്ചു.

ഇന്ന് രാവിലെ 11 മണിയോടെ ആയിരുന്നു സംഭവം. സ്വകാര്യ ബസ് സ്റ്റാന്‍ഡിന് സമീപത്തെ ഫ്ലൈ ഓവറിന്‍റെ തുടക്കഭാഗത്ത് നിർത്തിയിട്ടിരുന്ന തിരുവനന്തപുരം സ്വദേശിയുടെ ഉടമസ്ഥതയിലുള്ള കാറിനാണ് തീപിടിച്ചത്.

സംഭവം കണ്ട സമീപത്തെ സ്ഥാപന ഉടമ വിവരമറിയിച്ചതിനെ തുടർന്ന് തിരുവല്ലയിൽ നിന്നുള്ള അഗ്നിശമന സേനയെത്തി തീ അണയ്ക്കുകയായിരുന്നു. ഷോർട്ട് സർക്യൂട്ടാവാം തീപിടിത്തത്തിന് കാരണമെന്നാണ് പ്രാഥമിക നിഗമനം. സംഭവത്തെ തുടർന്ന് അരമണിക്കൂറോളം നേരം ബൈപാസിൽ ഗതാഗതം തടസ്സപ്പെട്ടു.