കാറും ഇരുചക്ര വാഹനങ്ങളും കൂട്ടിയിടിച്ച് രണ്ടുപേർക്ക് പരിക്ക്

തിരുവല്ല : എം.സി റോഡിലെ കുറ്റൂർ ആറാട്ടു കടവിൽ കാറും ഇരുചക്ര വാഹനങ്ങളും കൂട്ടിയിടിച്ചുണ്ടായ അപകടത്തിൽ രണ്ടുപേർക്ക് പരിക്കേറ്റു. ഒരാളുടെ നില ഗുരുതരം. സ്കൂട്ടർ യാത്രികൻ തലയാർ മേമനയിൽ വീട്ടിൽ സോമൻ, ബൈക്ക് യാത്രികൻ കവിയൂർ സ്വദേശി സുജീഷ് എന്നിവർക്കാണ് പരിക്ക്.

ചൊവ്വാഴ്ച രാവിലെ 10ന് ആറാട്ടുകടവ് ജങ്ഷനിലായിരുന്നു അപകടം. ചെങ്ങന്നൂർ ഭാഗത്തുനിന്നും വന്ന കാറും തലയാർ ഭാഗത്തേക്ക് പോയ ആക്ടീവ സ്കൂട്ടറുമാണ് കൂട്ടിയിടിച്ചത്. തുടർന്ന് നിയന്ത്രണം വിട്ട കാർ ബൈക്കിലും ഇടിക്കുകയായിരുന്നു. ഇരുവരെയും തിരുവല്ലയിലെ സ്വകാര്യ മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. സോമന്‍റെ നില ഗുരുതരമാണ്.