പത്തനംതിട്ട നഗരസഭ ഭരണത്തിന്റെ രണ്ട് വർഷം: പ്രോഗ്രസ് റിപ്പോർട്ട് പുറത്തിറക്കി
text_fieldsപത്തനംതിട്ട നഗരസഭ ഭരണസമിതിയുടെ പ്രവർത്തനങ്ങൾ വിലയിരുത്തുന്ന പ്രോഗ്രസ് റിപ്പോർട്ട് പുറത്തിറക്കി സി.പി.എം ജില്ല സെക്രട്ടറി കെ.പി. ഉദയഭാനു സംസാരിക്കുന്നു
പത്തനംതിട്ട: നഗരസഭ ഭരണസമിതിയുടെ രണ്ടുവർഷത്തെ പ്രവർത്തനം വിലയിരുത്തുന്ന പ്രോഗ്രസ് റിപ്പോർട്ട് പുറത്തിറക്കി. സി.പി.എം ജില്ല സെക്രട്ടറി കെ.പി. ഉദയഭാനു പ്രകാശനം ചെയ്തു. വികസനം എന്നത് പ്രഖ്യാപനങ്ങൾപ്പുറം ജനങ്ങൾക്ക് അനുഭവവേദ്യമാകുന്നതാകണം എന്ന ലക്ഷ്യത്തോടെയാണ് ഭരണസമിതി ചുമതലയേറ്റതെന്ന് അദ്ദേഹം പറഞ്ഞു.മുൻ ഭരണസമിതികൾ തുടങ്ങിവെച്ച പ്രവർത്തനം പൂർത്തിയാക്കി ജനങ്ങൾക്ക് ഉപയോഗയോഗ്യമാക്കാനാണ് നഗരസഭ ആദ്യം ഊന്നൽ നൽകിയതെന്ന് ചെയർമാൻ അഡ്വ. ടി. സക്കീർ ഹുസൈൻ പറഞ്ഞു.
ബഡ്സ് സ്കൂൾ, ഷീ ലോഡ്ജ്, വനിത ഹോസ്റ്റൽ, സ്മാർട്ട് അംഗൻവാടികൾ, ആധുനിക സൗകര്യങ്ങൾ ഒരുക്കിയ ശ്രീചിത്ര തിരുനാൾ സ്മാരക ടൗൺ ഹാൾ തുടങ്ങി നിരവധി പ്രവർത്തനങ്ങൾ പൂർത്തിയാക്കി ജനങ്ങൾക്കായി സമർപ്പിക്കാൻ ഒന്നാംവർഷം തന്നെ ഭരണസമിതിക്ക് കഴിഞ്ഞെന്നും അദ്ദേഹം പറഞ്ഞു. എൽ.ഡി.എഫ് നഗരസഭ കൺവീനർ കെ. അനിൽകുമാർ അധ്യക്ഷത വഹിച്ചു.
ഡെപ്യൂട്ടി ചെയർപേഴ്സൻ ആമിന ഹൈദരലി, എൽ.ഡി.എഫ് പാർലമെന്ററി പാർട്ടി സെക്രട്ടറി പി.കെ. അനീഷ്, എൽ.ഡി.എഫ് നേതാക്കളായ പി.വി. അശോക് കുമാർ, അൻസാരി എസ്. അസീസ്, അബ്ദുൽ മനാഫ്, എം.ജെ. രവി, മുണ്ടുകൊട്ടക്കൽ സുരേന്ദ്രൻ, പി.കെ. ജേക്കബ്, മാത്യു മരോട്ടീമൂട്ടിൽ, സുമേഷ് ഐശ്വര്യ, ബിജു മുസ്തഫ, ഷാഹുൽ ഹമീദ്, സത്യൻ കണ്ണങ്കര, വികസനകാര്യ സ്ഥിരംസമിതി അധ്യക്ഷൻ കെ.ആർ. അജിത്കുമാർ, ആരോഗ്യ സ്ഥിരംസമിതി അധ്യക്ഷൻ ജെറി അലക്സ്, പൊതുമരാമത് സ്ഥിരംസമിതി അധ്യക്ഷൻ ഇന്ദിരമണിയമ്മ എന്നിവർ സംബന്ധിച്ചു.
മാസ്റ്റർപ്ലാൻ പബ്ലിക് സെമിനാർ നാളെ
പത്തനംതിട്ട: നഗര വികസനത്തിൽ നാഴികക്കല്ലാകുന്ന മാസ്റ്റർ പ്ലാനിന്റെ പബ്ലിക് സെമിനാർ ശനിയാഴ്ച രാവിലെ 10 മുതൽ ശ്രീചിത്തിര തിരുനാൾ സ്മാരക ടൗൺ ഹാളിൽ ചേരും. പത്തനംതിട്ടയുടെ ഭാവി വികസനത്തെക്കുറിച്ചുള്ള കാഴ്ചപ്പാടുകളിൽ പൊതുജനാഭിപ്രായം രൂപപ്പെടുത്താനാണ് സെമിനാർ.
ഗ്രേറ്റർ പത്തനംതിട്ട എന്ന ആശയവും പബ്ലിക് സെമിനാറിൽ ചർച്ചയാകും. ജില്ല ആസ്ഥാനത്തെ ജനങ്ങളുടെ ജീവിതസൗകര്യങ്ങൾ മെച്ചപ്പെടുത്താനുള്ള മികച്ച നിർദേശങ്ങൾ സെമിനാറിൽ ഉണ്ടാകുമെന്ന് പ്രതീക്ഷിക്കുന്നതായി നഗരസഭ ചെയർമാൻ അഡ്വ. ടി. സക്കീർ ഹുസൈൻ പറഞ്ഞു.
![Girl in a jacket](https://www.madhyamam.com/h-library/newslettericon.png)
Don't miss the exclusive news, Stay updated
Subscribe to our Newsletter
By subscribing you agree to our Terms & Conditions.