ബാറിലെ തർക്കം ആക്രമണത്തിൽ കലാശിച്ചു; യുവാവിന് ഗുരുതര പരിക്ക്

മല്ലപ്പള്ളി: ബാറിലിരുന്ന് മദ്യപിച്ച സമയത്ത് ഇരുവിഭാഗം തമ്മിലുണ്ടായ തർക്കം പിന്നീട് കൈയാങ്കളിയിൽ കലാശിച്ചു. അടിപിടിയിൽ യുവാവിന് ഗുരുതര പരിക്ക്.മല്ലപ്പള്ളി പരിയാരം മേലേട്ടുകുന്നേൽ വീട്ടിൽ സുമേഷിനാണ് (35) പരിക്കേറ്റത്. ഞായറാഴ്ചയാണ് സംഭവം. മദ്യപാനത്തിനിടെ തർക്കത്തിൽ ഏർപ്പെട്ടവർ പിന്നീട് പുറത്തിറങ്ങി ബാറിനു മുന്നിൽ അസഭ്യം പറയുകയും വെല്ലുവിളിക്കുകയും ചെയ്തശേഷമാണ് പിരിഞ്ഞത്.

എന്നാൽ, വൈകീട്ട് ബൈക്കിൽ സഞ്ചരിക്കുകയായിരുന്ന സുമേഷിനെ മല്ലപ്പള്ളി-ആനിക്കാട് റോഡിലെ ബൈപാസിനു സമീപത്തുവെച്ച് ഇവർ മർദിക്കുകയായിരുന്നു. നാലുപേരുള്ള സംഘം മർദിച്ച ശേഷം ബൈക്കിൽ കടന്നുകളഞ്ഞു. ഗുരുതരമായി പരിക്കേറ്റ സുമേഷിനെ പൊലീസെത്തി താലൂക്ക് ആശുപത്രിയിൽ എത്തിച്ച് പ്രാഥമികചികിത്സ നൽകിയശേഷം കോട്ടയം മെഡിക്കൽ കോളജിലേക്ക് മാറ്റി.

തലക്കും പുറത്തും കൈക്കും പരിക്കേറ്റിട്ടുണ്ട്. ബാറിലെ തർക്കത്തെ തുടർന്നുള്ള വിരോധമാണ് ആക്രമണത്തിന് കാരണമെന്നും ചങ്ങനാശ്ശേരി ഭാഗത്തുള്ള നാലുപേരാണ് ആക്രമിച്ചതെന്നും പൊലീസ് പറഞ്ഞു.