കുടുംബത്തിലെ എട്ട് പേരെ കാണാതായതായി പരാതി

എറിയാട് (തൃശൂർ): കുടുംബത്തിലെ എട്ടു പേരെ കാണാതായതായി ബന്ധുവി​ന്‍റെ പരാതി. അഴീക്കോട് സൂനാമി കോളനിയിൽ വാടകക്ക് താമസിച്ചിരുന്ന കൈമപറമ്പിൽ ഉഷയെയും കുടുംബത്തെയുമാണ് കാണാതായത്. ഉഷയുടെ മകൻ അരുൺ, ഭാര്യ കാവ്യ, രണ്ടര വയസ്സുള്ള മകൾ വിയാദ്യ, ഉഷയുടെ മകൾ സൗമ്യ, ഭർത്താവ് ലാലു, മക്കളായ ശ്രീലക്ഷ്മി (10), ശ്രീപ്രിയ (എട്ട്​) എന്നിവരെയാണ് വ്യാഴാഴ്ച രാത്രി മുതൽ കാണാതായതായി ഇവരുടെ ബന്ധു കൊടുങ്ങല്ലൂർ പൊലീസിൽ പരാതി നൽകിയത്. പൊലീസ് അന്വേഷണത്തിൽ തൃശൂർ കെ.എസ്.ആർ.ടി.സി ബസ്​സ്റ്റാൻഡ്​ വരെ ഇവർ ഓട്ടോയിൽ യാത്ര ചെയ്തതായി പറയുന്നു. ബംഗളൂരുവിൽ കല്യാണത്തിന് പോകുകയാണെന്നും അതിന് മുമ്പ് തലശേരിയിൽ പോകേണ്ടതുണ്ടെന്നും ഓട്ടോ ഡ്രൈവറോട് പറഞ്ഞിരുന്നു. കുടുംബാംഗങ്ങളുടെ മൊബൈൽ ഫോൺ സ്വിച്ച് ഓഫാണ്. ഇവർ താമസിച്ചിരുന്നിടത്ത് പരിസരവാസികളുമായി സാമ്പത്തിക ഇടപാടുകൾ നടത്തിയിരുന്നതായി സൂചനയുണ്ടെന്ന് പൊലീസ് പറഞ്ഞു.