ബസ്​ സമരത്തിന്​ തൊഴിലാളികളുടെ ഐക്യദാർഢ്യം

തൃശൂർ: സ്വകാര്യ ബസുകളുടെ നിലനിൽപ്പിന്​ ആവശ്യമായ കാര്യങ്ങൾ നേടിയെടുക്കാൻ ചൊവ്വാഴ്​ച മുതൽ ബസുടമ സംയുക്ത സമരസമിതി സംസ്ഥാന വ്യാപകമായി നടത്തുന്ന അനിശ്ചിതകാല പണിമുടക്കിന് തൊഴിലാളി സംഘടനകൾ ഐക്യദാർഢ്യം പ്രഖ്യാപിച്ചു. സ്വകാര്യ ബസ്​ മേഖല കടുത്ത സാമ്പത്തിക പ്രതിസന്ധിയിലാണ്. തൊഴിലാളികൾക്ക് ന്യായമായ ശമ്പളം നൽകാനുള്ള വരുമാനം പോലും ഡീസലടിച്ചതിനുശേഷം ബസുടമകൾക്ക് ബസ് സർവിസ് നടത്തിയാൽ ലഭിക്കുന്നില്ല. അതുകൊണ്ട്​ തന്നെ സമരത്തിന് എല്ലാ തൊഴിലാളി സംഘടനകളും ഐക്യദാർഢ്യം പ്രഖ്യാപിക്കുന്നതായി കെ.പി. സണ്ണി (സി.ഐ.ടി.യു), എം.എം. വൽസൻ (ബി.എം.എസ്), കെ.കെ. ഹരിദാസ് (എ.ഐ.ടി.യു.സി), വി.എ. ഷംസുദ്ദീൻ (ഐ.എൻ.ടി.യു.സി) എന്നിവർ അറിയിച്ചു.