വെള്ളിക്കുളങ്ങര വനത്തിൽനിന്ന് കടത്തിയത്​ ഇരുനൂറോളം ചന്ദനത്തടികൾ

തൃശൂർ: വെള്ളിക്കുളങ്ങര വനമേഖലയിൽനിന്ന് 44 ചന്ദനത്തടികൾ മുറിച്ചുകടത്തിയത്​ പിടികൂടിയതിന് പിന്നാലെ വനംവകുപ്പ് വിജിലൻസ്​ നടത്തിയ പരിശോധനയിൽ ഇരുനൂറോളം ചന്ദനത്തടികൾ മുറിച്ചുകടത്തിയതായി കണ്ടെത്തി. പൂർണ വളർച്ചയെത്തിയാൽ കോടികൾ സർക്കാർ ഖജനാവിൽ എത്തേണ്ടിയിരുന്ന ചന്ദനമരങ്ങളാണ് നഷ്​ടപ്പെട്ടത്. റേഞ്ച് ഓഫിസർ ഭാസി ബാഹുലേയ​െൻറ നേതൃത്വത്തിൽ അഞ്ചംഗ സംഘമാണ് കോടശ്ശേരി റിസർവിലെ മേച്ചിറക്കുന്നിൽ പരിശോധന നടത്തിയത്.

ഉന്നതോദ്യോഗസ്ഥരുടെ ശരിയായ നിരീക്ഷണം വനസംരക്ഷണ കാര്യത്തിൽ ഉണ്ടായില്ലെന്ന്​ വിജിലൻസ് കണ്ടെത്തിയെന്നാണ് സൂചന. 44 ചന്ദനമരങ്ങൾ മുറിച്ചുകടത്തിയതിന് തൊണ്ടിസഹിതം പിടിയിലായ നാലു പ്രതികൾ റിമാൻഡിലാണ്. ഇവരെ കസ്​റ്റഡിയിൽവാങ്ങി കൂടുതൽ അന്വേഷണത്തിന് ഒരുങ്ങുകയാണ് വകുപ്പ്. വെള്ളിക്കുളങ്ങര റേഞ്ച് ഓഫിസർക്കാണ് അന്വേഷണചുമതല.

കോടികൾ നഷ്​ടംവന്ന ഈ കേസുകളിൽ വെറും നാലു ലക്ഷത്തിന് താഴെയാണ് സർക്കാർ നഷ്​ടം കണക്കാക്കിയിരിക്കുന്നത്.