കോവിഡ് പരിശോധന കേന്ദ്രത്തിന് പിഴ

കാഞ്ഞാണി: കോവിഡ് ​േപ്രാട്ടോകോൾ ലംഘിച്ച് തുറന്നുപ്രവർത്തിച്ച കാഞ്ഞാണിയിലെ കോവിഡ് പരിശോധന കേന്ദ്രത്തിന് അധികൃതർ പിഴയിട്ടു. കോവിഡ് അനുബന്ധ മാനദണ്ഡങ്ങൾ എഴുതി പ്രദർശിപ്പിക്കുകയോ പരിശോധന നിരക്കുകൾ പരസ്യപ്പെടുത്തുകയോ ചെയ്​തിട്ടില്ലെന്നും സാമൂഹിക അകലം പാലിക്കാൻ ഇടപെട്ടില്ലെന്നും പരിശോധനയിൽ വ്യക്തമായി. കോവിഡ്​, പ്ര​മേഹം എന്നിവ പരിശോധിക്കാൻ എത്തുന്നവർക്കും എക്​സ്​റേ എടുക്കാൻ എത്തുന്നവർക്കും ഒറ്റവരി മാത്രമാണെന്നത് ഗുരുതര വീഴ്ചയാണെന്ന് സംയുക്ത പരിശോധനക്ക് നേതൃത്വം നൽകിയ മണലൂർ സെക്​ടറൽ മജിസ്ട്രേറ്റ് ലക്ഷ്മി മോഹൻ പറഞ്ഞു. ആവശ്യമായ തിരുത്തലുകൾ അടിയന്തരമായി ഉണ്ടാകണമെന്നും അവർ ബന്ധപ്പെട്ടവർക്ക് നിർദേശം നൽകി. ബുധനാഴ്ച രാവിലെയാണ്​ പരിശോധന നടത്തിയത്​.

കണ്ടശ്ശാംകടവ്, കാഞ്ഞാണി മാർക്കറ്റിലും വ്യാപാര കേന്ദ്രങ്ങളിലും പരിശോധന നടത്തി. റോഡിലൂടെ മാസ്​ക്​ വെക്കാതെ യാത്ര ചെയ്​ത 15 പേർക്ക് പിഴയിട്ടു. എല്ലാ ദിവസങ്ങളിലും പരിശോധന തുടരും. മണലൂർ ഗ്രാമപഞ്ചായത്ത് പ്രസിഡൻറ് വിജി ശശി, വൈസ്​ പ്രസിഡൻറ്​ എം.ആർ. മോഹനൻ, ഹെൽത്ത് ഇൻസ്പക്ടർ എം.ഡി. ബിമൽ കുമാർ, ഹെൽത്ത് ജൂനിയർ ഇൻസ്പക്ടർമാരായ കെ.കെ. രാജേഷ്, പി.വി. വാസുദേവൻ എന്നിവർ പങ്കെടുത്തു.