കരുവന്നൂർ ബാങ്ക്​: അടിയന്തരമായി 156 കോടി വേണം

തൃശൂർ: വായ്​പാതട്ടിപ്പ്​ കാരണം പ്രതിസന്ധിയിലായ കരുവന്നൂർ സഹകരണ ബാങ്കിന് അടിയന്തരമായി 156 കോടി രൂപ വേണമെന്ന് വിദഗ്ധ സമിതി. ആസ്തി ബാധ്യത പരിശോധനക്കായി നിയോഗിച്ച സമിതിയുടെ റിപ്പോർട്ട് സർക്കാറിന് സമർപ്പിച്ചു. കടുത്ത സാമ്പത്തിക പ്രതിസന്ധിയിലായ ബാങ്കി​െൻറ നിലനിൽപ്പിന് നിക്ഷേപകരുടെയും പൊതുജനങ്ങളുടെയും വിശ്വാസ്യത നേടേണ്ടതുണ്ട്. ഇതിനായി നിലവിലുള്ള പ്രതിസന്ധിയുടെ ആഴം കുറക്കണം. അടിയന്തര സഹായമായി 156 കോടി രൂപ ലഭിച്ചാലേ നിലവിലെ സാഹചര്യം മറികടക്കാനാവൂ. ബാങ്കി​െൻറ വിശ്വാസ്യത നിലനിർത്താൻ നിക്ഷേപകൻ എത്തുമ്പോൾ ലഭ്യമാകും വിധത്തിൽ പണം നൽകാൻ കഴിയണം. ക്രയവിക്രയത്തിന് ആവശ്യമായ തുക വേണ്ടതുണ്ട്. നിശ്ചിത തുക ടോക്കണും ചെക്കും ഉപയോഗിച്ച്​ നൽകുന്ന നിലവിലെ രീതി അവിശ്വാസത്തിന് ആക്കം കൂട്ടും. ഇത് പരിഹരിക്കണം.

കരുവന്നൂർ ബാങ്കിന് അനുവദിക്കുന്ന തുക ബാങ്കുകളുടെ കൺസോർഷ്യം വഴി സർക്കാർ ഗാരൻറിയിലൂടെ നൽകണമെന്ന് ഒമ്പതംഗ സമിതി റിപ്പോർട്ടിൽ പറയുന്നു. ബാങ്ക് പ്രവർത്തനം സാധാരണ നിലയിലായെന്ന്​ ബോധ്യപ്പെട്ടാൽ നിക്ഷേപങ്ങൾ മടക്കിക്കൊണ്ടുവരാൻ കഴിയും. ഇടപാടുകൾ വിപുലമാക്കി നിലവിലുള്ള ബാധ്യകളെയും മറികടക്കാനാവും. ഇതിനായി വിവിധ പദ്ധതികളുടെ നിർദേശങ്ങളും റിപ്പോർട്ടിൽ വ്യക്തമാക്കുന്നു.

ബാങ്ക് ഭരണം അഡ്മിനിസ്ട്രേറ്ററിൽ നിന്ന് തൽക്കാലം മാറ്റരുത്, ഒാഡിറ്റ് ശക്തമാക്കുക, വായ്പ കുടിശ്ശികയിലും കിട്ടാക്കടങ്ങളിലും തിരിച്ചടവിന്​ നടപടി സ്വീകരിക്കുക, സൂപ്പർമാർക്കറ്റുകളിലെയും നീതി സ്​റ്റോറിലെയും കണക്കുകൾ വെവ്വേറെ സൂക്ഷിക്കുക, ജീവനക്കാരുടെ പ്രവർത്തനങ്ങൾ നിരീക്ഷിക്കുക, തട്ടിപ്പുകാരുടെ ആസ്തി കണ്ടുകെട്ടുക തുടങ്ങിയ നിർദേശങ്ങളും സമിതിയുടെ റിപ്പോർട്ടിൽ ചൂണ്ടിക്കാട്ടുന്നു.