വാസുദേവ​െൻറയും ചന്ദ്രാവതിയുടെയും 'കൊറോണക്കല്യാണത്തിന്'​ ഞായറാഴ്​ച അമ്പതാണ്ട്

കൊടകര: കോവിഡ്കാല നിയന്ത്രണങ്ങൾ ഇല്ലാതിരുന്നകാലത്ത് 15പേരെ മാത്രം പങ്കെടുപ്പിച്ച് നടത്തിയ വിവാഹത്തി​െൻറ 50ാം വാര്‍ഷികം ഞായറാഴ്ച ആഘോഷിക്കുകയാണ് പേരാമ്പ്രയിലെ ദമ്പതികള്‍. കൊടകര പേരാമ്പ്ര വൈലോപ്പിള്ളി വീട്ടില്‍ വാസുദേവന്‍-ചന്ദ്രാവതി ദമ്പതികളുടെ വിവാഹം 1970 ഒക്ടോബര്‍ 25ന് ആലുവാപ്പുഴയുടെ തീരത്തെ അദ്വെതാശ്രമത്തിലായിരുന്നു. അന്ന് വാസുദേവന് 36ഉം ചന്ദ്രാവതിക്ക് 25ഉം വയസ്സായിരുന്നു.

ധൂര്‍ത്തും ആഡംബരവും ഒഴിവാക്കി ലളിതമായി വിവാഹം നടത്തുന്നതിനെക്കുറിച്ചുള്ള ശ്രീനാരായണ ഗുരുവി​െൻറ വചനങ്ങളാണ് ഇദ്ദേഹം പ്രയോഗത്തില്‍ വരുത്തിയത്. വധൂവരന്മാരുടെ വീടുകളില്‍നിന്ന്​ അഞ്ചുപേര്‍ വീതമാണ്​ ചടങ്ങില്‍ സംബന്ധിച്ചത്. കൂടാതെ, വാസുദേവ​െൻറ അടുത്ത സുഹൃത്തുക്കളായിരുന്ന മുന്‍ മന്ത്രി ലോനപ്പന്‍ നമ്പാടന്‍, ജോസഫ് കാളിയങ്കര, ടി.ടി. മാത്യു, ജോസ് എന്നിവരും സംബന്ധിച്ചു. വധുവിന് ചാര്‍ത്തിയ താലിയില്‍ മുദ്രണംചെയ്തിരുന്നത് അശോകസ്തംഭമായിരുന്നു.

ആനന്ദപുരം ശ്രീകൃഷ്ണ ഹൈസ്‌കൂളിലെ ഹിന്ദി അധ്യാപികയായിരുന്നു ചന്ദ്രാവതി. ജീവിതത്തിലുടനീളം ദേശീയപ്രസ്ഥാനത്തി​െൻറ ഓര്‍മകളുമായി ജീവിക്കുന്ന വാസുദേവന്‍ ഖാദി വസ്ത്രങ്ങള്‍ മാത്രമേ ധരിക്കാറുള്ളൂ. 58 വര്‍ഷമായി എല്‍.ഐ.സിയുടെ ഏജൻറായ അദ്ദേഹം എല്‍.ഐ.സി തൃശൂര്‍ ഡിവിഷനു കീഴിലെ എറ്റവും മുതിര്‍ന്ന ഏജൻറാണ്. മക്കള്‍: സുനില്‍, സജീവ്, സിദ്ധന്‍.