കോവിഡ് സ്ഥിരീകരിച്ച ജീവനക്കാരെ പുറത്താക്കി കടയടച്ച് ഉടമ സ്ഥലംവിട്ടു

കുന്നംകുളം: കോവിഡ് സ്ഥിരീകരിച്ച മൂന്നു ജീവനക്കാരെ പുറത്താക്കി കടയടച്ച് ഉടമസ്ഥൻ സ്ഥലംവിട്ടു. രണ്ടു വനിതകൾ ഉൾ​െപ്പടെയുള്ള ജീവനക്കാർ എവിടേക്ക് പോകണമെന്നറിയാതെ റോഡരികിലെ കടവരാന്തയിൽ ഇരുന്നത്​ മൂന്നര മണിക്കൂർ. കുന്നംകുളം ബൈജു റോഡിലെ സ്ഥാപനത്തിലാണ്​ സംഭവം.

ചുമട്ടുതൊഴിലാളികൾ മുഖേന വിവരമറിഞ്ഞ നഗരസഭ അധികൃതരാണ്​ ജീവനക്കാരെ ഇവിടെനിന്ന്​ മാറ്റിയത്​. നഗരസഭ ഹെല്‍ത്ത് ഇന്‍സ്‌പെക്ടര്‍ എം.എസ്. ഷീബയും നഗരസഭ കണ്‍ട്രോള്‍ റൂമിലെ ചുമതലക്കാരനായ കെ.എസ്. സുമനും ചേര്‍ന്ന് മൂവരെയും ആംബുലന്‍സില്‍ നഗരസഭ വക ഡൊമിസിലിയറി കെയര്‍ സെൻററിലേക്ക് മാറ്റുകയായിരുന്നു. ഇവരില്‍ ഒരു സ്ത്രീ അവശയായതിനാല്‍ പിന്നീട്​ നഗരസഭ ചെയർപേഴ്‌സൻ സീത രവീന്ദ്രന്‍ ഇടപെട്ട് മൂവരെയും താലൂക്ക് ആശുപത്രിയിലെ എസ്.എഫ്.എല്‍.ടി.സിയിലേക്ക് മാറ്റി.

ജീവനക്കാരെ വഴിയില്‍ ഉപേക്ഷിച്ച കച്ചവടക്കാര​െൻറ ലൈസന്‍സ് റദ്ദാക്കാതിരിക്കാന്‍ കാരണം ബോധിപ്പിക്കണമെന്ന്​ ആവശ്യപ്പെട്ട് നോട്ടീസ് നല്‍കിയതായി നഗരസഭ സെക്രട്ടറി ടി.കെ. സുജിത്ത് അറിയിച്ചു.