ലൈഫ്​ സർവേ: വിട്ടുനിന്നാൽ നടപടിയെന്ന്​ പഞ്ചായത്തുകൾ​

തൃശൂർ: ലൈഫ്​ ഭവന പദ്ധതി ഗുണഭോക്തൃ ലിസ്​റ്റിൽ ഉൾപ്പെടാതെ പോയവരുടെ പട്ടിക തയാറാക്കുന്ന യോഗങ്ങളിൽ പ​ങ്കെടുക്കില്ലെന്ന്​ കൂടുതൽ കൃഷി ഉദ്യോഗസ്ഥർ തദ്ദേശസ്ഥാപനങ്ങളെ അറിയിച്ചു. മറ്റ്​ വകുപ്പുകളുടെ പ്രവർത്തനങ്ങളിൽനിന്ന്​ ജീവനക്കാരെ വിലക്കിയ കൃഷി വകുപ്പ്​ അഡീഷനൽ സെക്രട്ടറിയുടെ ഉത്തരവ്​ ചൂണ്ടിക്കാട്ടിയാണിത്​. അതേസമയം, പഞ്ചായത്തീരാജ്​ നിയമത്തിനെതിരാണ്​ നടപടിയെന്നും പ​െങ്കടുത്തില്ലെങ്കിൽ ശിക്ഷനടപടി സ്വീകരിക്കാൻ ​അധികാരമുണ്ടെന്നും കാണിച്ച്​ അടിമാലി ഗ്രാമപഞ്ചായത്ത്​ പ്രസിഡൻറ്​ ശിപാർശ നൽകി. ഇതേ നടപടി മറ്റ്​ പഞ്ചായത്തുകളിലും സ്വീകരിക്കാമെന്ന്​ കേരള ഗ്രാമപഞ്ചായത്ത്​ അസോസിയേഷൻ പഞ്ചായത്തുകളെ അറിയിച്ചിട്ടുണ്ട്​.

ഫീൽഡ്​ ജീവനക്കാരെ കാർഷികേതര ആവശ്യങ്ങൾക്ക്​ നിയോഗിക്കരുതെന്ന 2017ൽ ​ഇറക്കിയ ഉത്തരവ്​ ഉയർത്തിക്കാട്ടിയാണ്​ കൃഷി വകുപ്പ് പുതിയ ഉത്തരവിറക്കിയതെങ്കിലും അത്​ ഹൈകോടതി സ്​റ്റേ ചെയ്​തിരുന്നു. കാഞ്ഞിരപ്പിള്ളി പഞ്ചായത്തി​െൻറ പരാതിയിലായിരുന്നു സ്​റ്റേ. പിന്നീട്​ ചീഫ്​ സെക്രട്ടറി കൃഷി വകുപ്പി​െൻറ കൂട്ടുത്തരവാദിത്തമില്ലായ്​മയെ വിമർശിക്കുകയും ചെയ്​തിരുന്നു. കേരള പഞ്ചായത്തീരാജ്​ നിയമം 181, 184 എന്നിവ പ്രകാരം പഞ്ചായത്തി​െൻറ ഏത്​ ചുമതലയും ഗ്രാമപഞ്ചായത്തിലേക്ക്​ കൈമാറിയ സ്ഥാപനങ്ങളിലെ ഏത്​ ഉദ്യോഗസ്ഥനെയും അവരുടെ പ്രവർത്തന മേഖല പരിഗണിക്കാതെ ഏൽപിക്കാമെന്നാണ്​​ വ്യവസ്ഥ. ഇക്കാര്യം വിശദമാക്കി ഗ്രാമപഞ്ചായത്ത്​ അസോസിയേഷൻ മുഖ്യമന്ത്രിക്കും പരാതി നൽകിയിരുന്നു.

ലൈഫ്​ ഗുണഭോക്തൃ ലിസ്​റ്റിൽ ഉൾപ്പെടാതെ പോയവരുടെ പട്ടിക തയാറാക്കാനുള്ള യോഗം മിക്ക പഞ്ചായത്തുകളിലും അടുത്ത ദിവസങ്ങളിൽ നടക്കും​. വി.ഇ.ഒമാർക്ക്​ പുറമെ അസിസ്​ൻറൻറ്​ സെക്രട്ടറി, ഐ.സി.ഡി.എസ്​ സൂപ്പർവൈസർ, അഗ്രികൾചർ അസിസ്​റ്റൻറുമാർ എന്നിവരെയാണ്​ യോഗത്തിലേക്കും പരിശീലന ക്ലാസുകളിലേക്കും വിളിച്ചത്​. ഈ യോഗത്തിന്​ ശേഷമാകും ഗ്രാമപഞ്ചായത്തുകൾ തുടർനടപടി സ്വീകരിക്കുക.