പാതയോരങ്ങളിലെ പരസ്യങ്ങൾക്ക്​ തദ്ദേശവകുപ്പ്​ കടിഞ്ഞാണിടുന്നു

തൃശൂർ: പാതയോരങ്ങളിലെ രാഷ്ട്രീയ-വർഗ-ബഹുജന-സാമുദായിക സംഘടനകളുടെ പരസ്യപ്രചാരണങ്ങൾക്ക്​ തദ്ദേശവകുപ്പ്​ കടിഞ്ഞാണിടുന്നു. ഇനി കൊടിമരങ്ങളും തോരണങ്ങളും പരസ്യങ്ങളും സ്ഥാപിക്കാൻ തദ്ദേശ സ്ഥാപന സെക്രട്ടറിമാരുടെ മുൻകൂർ അനുവാദം വേണം. സമ്മേളനങ്ങൾ, ഉത്സവങ്ങൾ എന്നിവയോടനുബന്ധിച്ച്​ തോരണങ്ങൾ സ്ഥാപിക്കാനും അനുമതി​ വേണം. ഗതാഗതത്തിനും കാൽനടക്കും തടസ്സമാകുന്ന രീതിയിൽ ​പരസ്യങ്ങളും തോരണങ്ങളും അനുവദിക്കില്ല.

കൊടിമരങ്ങളും പരസ്യങ്ങളും സ്ഥാപിക്കുന്നതുമായി ബന്ധപ്പെട്ട്​ തർക്കം ഉടലെടുത്താൽ തദ്ദേശ സെക്രട്ടറി കലക്ടറുടെയും ജില്ല പൊലീസ്​ മേധാവിയുടെയും സഹായം തേടണം. സുരക്ഷ ഉറപ്പാക്കേണ്ട ഉത്തരവാദിത്തം അവർക്കാ​ണ്​. സ്വകാര്യ മതിലുകളിലും കോമ്പൗണ്ടുകളിലും ഉടമസ്ഥന്‍റെ അനുവാദത്തോടെ കൊടിമരങ്ങളും തോരണങ്ങളും സ്ഥാപിക്കാൻ തദ്ദേശസ്ഥാപനങ്ങൾക്ക്​ അനുമതി നൽകാം. ഗതാഗതത്തിനും കാൽനടക്കും തടസ്സമാകുന്ന രീതിയിൽ പരസ്യംചെയ്തിട്ടുണ്ടെങ്കിൽ സെക്രട്ടറിമാർ അടിയന്തരമായി നീക്കാൻ നടപടി സ്വീകരിക്കണമെന്ന്​ തദ്ദേശവകുപ്പ്​ അഡീഷനൽ ചീഫ്​ സെക്രട്ടറി ശാരദ മുരളീധരൻ സർക്കുലറിൽ നിർദേശിച്ചു.

സംസ്ഥാനത്തെ പാതയോരങ്ങളിൽ അനധികൃതമായി സ്ഥാപിച്ച കൊടിമരങ്ങളും തോരണങ്ങളും നീക്കം ചെയ്യുന്നതുമായി ബന്ധപ്പെട്ട ഹൈകോടതി വിധിയുടെ അടിസ്ഥാനത്തിലാണ്​ തീരുമാനം. ഇക്കാര്യത്തിൽ നയം രൂപവത്​കരിക്കാൻ സംസ്ഥാന സർക്കാറിന്​ ഹൈകോടതി നിർദേശം നൽകിയിരുന്നു. ഇതിന്‍റെ അടിസ്ഥാനത്തിൽ ചേർന്ന സർവകക്ഷി യോഗത്തിന്‍റെ അടിസ്ഥാനത്തിൽ രൂപപ്പെട്ട നിർദേശങ്ങളാണ്​ പൊതു മാർഗനിർദേശത്തിന്‍റെ രൂപത്തിൽ കഴിഞ്ഞദിവസം പുറത്തിറങ്ങിയത്​.

പൊതുസ്ഥലങ്ങളിൽ അനധികൃത ഫ്ലക്സുകളോ കൊടികളോ ഹോർഡിങ്ങുകളോ വെച്ചാൽ പിഴയും നിയമനടപടികളും സ്വീകരിക്കാൻ കേരള റോഡ്​ സേഫ്​റ്റി കമീഷണർ ഉത്തരവിട്ടിരുന്നു. ഇതനുസരിച്ച നടപടിക്കും തദ്ദേശസ്ഥാപനങ്ങളോട്​ ആവശ്യപ്പെട്ടിട്ടുണ്ട്​. നിലവിൽ സ്ഥാപിക്കപ്പെട്ട പരസ്യബോർഡുകൾ മാറ്റാനുള്ള ഉത്തരവാദിത്തം സ്ഥാപിച്ചവരെ ഏൽപിക്കണം. പരസ്യബോർഡുകളിൽ അത്​ തയാറാക്കിയ പരസ്യ ഏജൻസിയുടെ പേരും വിലാസവും ഫോൺനമ്പറും രേഖപ്പെടുത്തണമെന്നും നിർദേശിച്ചിട്ടുണ്ട്​. ഒട്ടേറെ വിധിന്യായങ്ങൾക്കും ഉത്തരവുകൾക്കും ശേഷമാണ്​ പൊതുനിരത്തിലെ അനധികൃത പരസ്യബോർഡുകളും കൊടിതോരണങ്ങളും നീക്കാനുള്ള നടപടികൾ തദ്ദേശവകുപ്പ്​ തുടങ്ങിയത്​. രാഷ്ട്രീയ പാർട്ടികളുടെ വിമുഖതയായിരുന്നു മെല്ലെപ്പോക്കിന്​ ഇടയാക്കിയത്​. ഇതിന്‍റെ ഭാഗമായി രാഷ്ട്രീയ പാർട്ടികൾ, പരസ്യഏജൻസികൾ എന്നിവരുമായി ഒ​ന്നിലധികം തവണ തദ്ദേശ വകുപ്പ്​ അധികൃതർ ചർച്ച നടത്തിയിരുന്നു.