ലൈസന്‍സില്ലാതെ സാനിറ്റൈസര്‍ നിര്‍മാണം: സ്ഥാപനത്തിനെതിരെ കേസ്​

തൃശൂർ: ലൈസന്‍സില്ലാതെ സാനിറ്റൈസര്‍ നിര്‍മിച്ച് വിതരണം നടത്തിയതിന്​ കയ്​പമംഗലത്ത് പ്രവര്‍ത്തിക്കുന്ന ബ്രിട്ടോണ എൻറര്‍പ്രൈസസ് എന്ന സ്ഥാപനത്തിനെതിരെ കേസെടുത്തു.

തൃശൂര്‍ അസിസ്​റ്റൻറ്​ കണ്‍ട്രോളര്‍ ഓഫിസ് ഉദ്യോഗസ്ഥര്‍ സ്ഥാപനത്തിൽ മിന്നല്‍പരിശോധന നടത്തുകയായിരുന്നു. ഇതരസംസ്ഥാനത്തുനിന്ന്​ കൊണ്ടുവരുന്ന സാനിറ്റൈസറുകളുടെ ലേബലുകളിലും പാക്കിങ്ങിലും മാറ്റംവരുത്തി വില്‍പന നടത്തിയതായും അന്വേഷണ ഉദ്യോഗസ്ഥര്‍ കണ്ടെത്തി.

മാനുഫാക്​ചറിങ് ലൈസന്‍സ് ഇല്ലാതെ സാനിറ്റൈസര്‍ നിര്‍മിക്കുന്നത് ഡ്രഗ്‌സ് ആൻഡ്​​ കോസ്‌മെറ്റിക്‌സ് നിയമപ്രകാരം അഞ്ചു​ വര്‍ഷത്തോളം തടവും ലക്ഷം രൂപവരെ പിഴയും ലഭിക്കാവുന്ന കുറ്റമാണ്. പിടിച്ചെടുത്ത വസ്​തുക്കളും രേഖകളും കൊടുങ്ങല്ലൂര്‍ ജുഡീഷ്യല്‍ ഫസ്​റ്റ്​ ക്ലാസ് മജിസ്‌ട്രേറ്റ് കോടതിയില്‍ ഹാജരാക്കും. പരിശോധനയില്‍ സീനിയര്‍ ഡ്രഗ്‌സ് ഇന്‍സ്‌പെക്​ടർ ബെന്നി മാത്യു, ഡ്രഗ്‌സ് ഇന്‍സ്​പെക്​ടർ ഇൻറലിജന്‍സ് വിഭാഗം എം.പി. വിനയന്‍ എന്നിവര്‍ പങ്കെടുത്തു.