മോഷണകേസിലെ പ്രതിക്ക് കോവിഡ്; പൊലീസുകാർ നിരീക്ഷണത്തിൽ

പുന്നയൂര്‍ക്കുളം: മോഷണ കേസിലെ പ്രതിക്ക് കോവിഡ് സ്ഥിരീകരിച്ചതിനെതുടർന്ന് വടക്കേകാട് എസ്‌.ഐ ഉള്‍പ്പെടെ ആറു പൊലീസുകാരോട് ആരോഗ്യവകുപ്പ് ക്വാറന്‍റീനിൽ കഴിയാന്‍ നിര്‍ദേശം നല്‍കി.

കഴിഞ്ഞ 28നാണ് കുന്നംകുളം മരത്തംകോട് സ്വദേശിയായ 47കാരനെ മാവിന്‍ചുടിലെ ഒരു വീട്ടില്‍ മോഷണം നടത്തിയതിനു അറസ്റ്റ് ചെയ്തത്. തുടർന്ന് റിമാൻഡ് ചെയ്തു. ഇയാളെ വെള്ളിയാഴ്ച കോവിഡ് ടെസ്റ്റ് നടത്തിയപ്പോഴാണ് ഫലം പോസിറ്റീവ് ആയത്.

അതേസമയം ആഗസ്റ്റ് 1,3തിയതികളില്‍ സ്‌റ്റേഷനിലെ പൊലീസുകാര്‍ ഉള്‍പ്പെടെയുള്ളവര്‍ ആന്‍റിജന്‍ പരിശോധനക്ക് വിധേയരായിരുന്നു. ഇതില്‍ എല്ലാവരും നെഗറ്റീവ് ആയിരുന്നു. എങ്കിലും മുന്‍കരുതലിന്‍റെ ഭാഗമായാണ് നിരീക്ഷണത്തില്‍ പോകുന്നതെന്ന് പൊലീസ് പറഞ്ഞു.