കാട്ടുപന്നിയെ വെടിവെക്കാൻ അനുമതി; ലൈസന്‍സുള്ളവരിൽ യോഗ്യതയുള്ളത്​ ചുരുക്കം ആളുകൾക്ക്​ മാത്രം

തിരുവനന്തപുരം: തോക്ക് ലൈസന്‍സുള്ളവർ സംസ്ഥാനത്താകെ 2000ത്തോളമുണ്ടെങ്കിലും കാട്ടുപന്നിയെ വെടിവക്കാന്‍ സന്നദ്ധതയും യോഗ്യതയുമുള്ളത് 600ഓളം പേര്‍ക്കുമാത്രമെന്ന്​ വനം വകുപ്പിന്‍റെ പ്രാഥമിക നിഗമനം. ഇതിൽതന്നെ കൃത്യമായി വെടിവെക്കാനറിയുന്നവർ ചുരുക്കമാണ്​. മന്ത്രിസഭ യോഗതീരുമാനത്തി​ന്‍റെ അടിസ്ഥാനത്തില്‍ തദ്ദേശ സ്ഥാപന അധ്യക്ഷര്‍ക്ക് കാട്ടുപന്നിയെ വെടിവെച്ചുകൊല്ലാൻ കഴിഞ്ഞദിവസം​ അനുമതി നൽകിയതുമായി ബന്ധപ്പെട്ടാണ്​ പ്രാഥമിക കണക്കെടുപ്പ്​ നടന്നത്​. റാപിഡ് റെസ്‌പോണ്‍സ് ടീമിന്‍റെ (ആർ.ആർ.ടി) സഹായവും ആവശ്യമെങ്കില്‍ ഉറപ്പാക്കും. സംസ്ഥാനത്താകെ രണ്ട്​ ജില്ലക്ക്​ ഒന്ന് എന്ന കണക്കില്‍ ഏഴ്​ ടീമാണ് ഇപ്പോള്‍ നിലവിലുള്ളത്. ലൈസന്‍സുള്ളവരുടെ പട്ടിക തദ്ദേശസ്ഥാപനതലത്തില്‍ എംപാനല്‍ ചെയ്യാന്‍ നിര്‍ദേശം നൽകിയിട്ടുണ്ട്​. തോക്ക് ലൈസന്‍സിനൊപ്പം, വെടിവെച്ചിടാന്‍ കൃത്യമായ പരിശീലനം കൂടി നേടിയവരുടെ പട്ടിക വനാതിര്‍ത്തിയിലുള്ള ഓരോ തദ്ദേശസ്ഥാപനവും തയാറാക്കാനാണ്​ വനം വകുപ്പു നിര്‍ദേശം. കൃത്യമായി തലയിൽ വെടിവെക്കണം. കാട്ടുപന്നിയുടെ കാര്യത്തിൽ അത്​ പ്രായോഗികമാകില്ല. സാധാരണ വെടിയേറ്റാൽ വന്യമൃഗങ്ങൾ പിൻതിരിഞ്ഞ്​ ഓടുകയാണ്​ പതിവ്​. എന്നാൽ, കാട്ടുപന്നിയാകട്ടെ വെടിവെക്കുന്ന ആൾക്കുനേരെ കുതിക്കും. അങ്ങനെ പന്നിയുടെ കുത്തേറ്റ്​ ജീവഹാനി സംഭവിച്ചവരുമുണ്ട്​. അതിനാൽ ലൈസൻസ്​ ഉള്ളവർക്ക്​ കൃത്യമായ പരിശീലനവും നൽകണം. റിസോഴ്‌സ് പേഴ്‌സൻ മാതൃകയിലാകും ഇവരുടെ സേവനം. തദ്ദേശ സ്ഥാപന ഫണ്ടില്‍നിന്നാണ്​ ഇവര്‍ക്കുള്ള പ്രതിഫലം നൽകുക. ആവശ്യമെങ്കില്‍ വനംവകുപ്പ്​ ഫണ്ടില്‍നിന്ന് ആവശ്യമായ തുക പഞ്ചായത്തുകള്‍ക്കു നല്‍കും. മൃഗവേട്ടയുമായി ബന്ധപ്പെട്ട്​ കേസുള്ളവരെ പട്ടികയില്‍ ഉള്‍പ്പെടുത്തില്ല. വെടിവെക്കാന്‍ പരിശീലനം സിദ്ധിച്ചവരുടെയും തോക്ക് ലൈസന്‍സുള്ളവരുടെയും അഭാവമുണ്ടെങ്കില്‍ രണ്ടോ മൂന്നോ പഞ്ചായത്തുകള്‍ ചേര്‍ന്നുള്ള പട്ടിക ഉണ്ടാക്കുന്ന കാര്യവും ആലോചനയിലാണ്​. വനം വകുപ്പിന്‍റെ കൈവശമുള്ള പട്ടിക തദ്ദേശ സ്ഥാപനങ്ങള്‍ക്ക്​ കൈമാറാനും തീരുമാനിച്ചിട്ടുണ്ട്​. നിലവില്‍ ഫോറസ്റ്റ് വൈല്‍ഡ് ലൈഫ് വാര്‍ഡനാണ് അനുമതി നല്‍കാൻ അധികാരം. കേന്ദ്ര നിയമത്തിന്‍റെ കൂടി അടിസ്ഥാനത്തിലാണ്​ ഉത്തരവിറക്കുക. പുതിയ നിര്‍ദേശത്തിനെതിരെ മേനകാ ഗാന്ധി എം.പി രംഗത്തിറങ്ങിയിട്ടുള്ള സാഹചര്യത്തില്‍ നിയമത്തിന്‍റെ പഴുതുകള്‍ പൂര്‍ണമായി അടച്ചാകും ഇതു​ നടപ്പാക്കുക.