ദേവസഹായംപിള്ള: കാറ്റടിമലയിൽ കൃതജ്ഞതാബലി ഇന്ന്

നാഗർകോവിൽ: ദേവസഹായംപിള്ളയെ വിശുദ്ധനാക്കിയതിന്റെ ഭാഗമായി നടക്കുന്ന കൃതജ്ഞതാബലി ഞായറാഴ്ച ആരുവാമൊഴി ദേവസഹായം മൗണ്ടിലുള്ള കാറ്റാടിമലയിൽ നടക്കും. ഉച്ചക്ക്​ 2.30ന് കലാപരിപാടികളോടെ ചടങ്ങുകൾ തുടങ്ങും. വൈകീട്ട് നാലിന് സ്വാഗതവും അഞ്ചിന് നന്ദി സൂചകമായി ആഡംബര തിരുബലിയും നടക്കുമെന്ന് കോട്ടാർ രൂപത ബിഷപ് നസ്റെൻ സൂസൈ അറിയിച്ചു. ചടങ്ങിൽ വത്തിക്കാനിലെ ഇന്ത്യൻ പ്രതിനിധി ലിയോപോൾഡോ ജിരല്ലി പങ്കെടുക്കും. കൂടാതെ ഇന്ത്യയുടെ വിവിധ സംസ്ഥാനങ്ങളിലെ രൂപത അധ്യക്ഷൻമാരും പങ്കെടുക്കും. ചടങ്ങിൽ പങ്കെടുക്കുന്നവർക്ക് എല്ലാ സൗകര്യങ്ങളും കാറ്റാടി മലയിൽ ഒരുക്കിയിട്ടുണ്ട്. ഇക്കഴിഞ്ഞ മേയ് 15ന് വത്തിക്കാനിൽ നടന്ന ചടങ്ങിലാണ് കന്യാകുമാരി നട്ടാലം സ്വദേശി ദേവസഹായംപിള്ളയെ ഫ്രാൻസിസ് മാർപാപ്പ വിശുദ്ധനായി പ്രഖ്യാപിച്ചത്.