ആനി മസ്ക്രിനോടുള്ള അനാദരവ്; മേയർ മാപ്പു പറയണം

തിരുവനന്തപുരം: സാമൂഹിക പരിഷ്കർത്താവും ഇന്ത്യൻ ഭരണഘടന ശിൽപികളിലൊരാളുമായിരുന്ന ആനി മസ്ക്രിന്‍റെ ജന്മദിനത്തിൽ അവരുടെ പ്രതിമയിൽ ശുചീകരണ തൊഴിലാളികളെക്കൊണ്ട് ഹാരാർപ്പണം നടത്തി അവഹേളിച്ച മേയറുടെ നടപടിക്കെതിരെ പ്രതിഷേധം. ആനി മസ്ക്രിന്‍റെ ജന്മദിനമായ ജൂൺ ആറിന് കേരള ലാറ്റിൻ കാത്തലിക് വിമൻസ് അസോസിയേഷന്‍റെ ആഭിമുഖ്യത്തിൽ വിപുലമായ ആഘോഷ പരിപാടികൾ നടക്കുന്നതിനിടയിലാണ് കോർപറേഷന്‍റെയും മേയറുടെയും ഭാഗത്തുനിന്ന് അവഹേളനപരമായ നടപടിയുണ്ടായത്. ഇത്തരത്തിലൊരു അനാദരവിന് ഉത്തരവാദികളായവർക്കെതിരെ കർശനമായ നടപടികൾ സ്വീകരിക്കണമെന്ന് കേരള ലാറ്റിൻ കാത്തലിക് വുമൻസ് അസോസിയേഷനും കേരള ലാറ്റിൻ കാത്തലിക് അസോസിയേഷനും സർക്കാറിനോട് ആവശ്യപ്പെട്ടു.