കാർ ഡി​വൈഡറിലിടിച്ച്​ മറിഞ്ഞു

വിഴിഞ്ഞം: കോവളം ബൈപാസിൽ നിയന്ത്രണംവിട്ട കാർ ഡിവൈഡറിലിടിച്ച്​ തലകീഴായി മറിഞ്ഞു. ഡ്രൈവർ നിസ്സാര പരിക്കോടെ രക്ഷപ്പെട്ടു. നെടുമം സ്വദേശി ഡോ. ആന്റണി ഓടിച്ചിരുന്ന കാറാണ് ഇന്നലെ പുലർച്ചെ രണ്ടോടെ കോവളം ജങ്​ഷനിൽ അപകടത്തിൽപെട്ടത്. തിരുവനന്തപുരത്തുനിന്ന് കോവളത്തേക്ക് വരുകയായിരുന്ന കാർ ഡിവൈഡറിൽ ഇടിച്ച ശേഷം പൊലീസ് സ്ഥാപിച്ച ബാരിക്കേഡും ദിശാസൂചിക ബോർഡും തകർത്ത്​ മുന്നോട്ടുപോയി. പാർക്ക് ചെയ്തിരുന്ന മറ്റൊരു കാറിലും ബൈക്കിലും ഇടിച്ച ശേഷമാണ് മറിഞ്ഞത്. ഡ്രൈവർ ഉറങ്ങിപ്പോയതാകാം അപകടകാരണമെന്ന്​ പൊലീസ്​ പറഞ്ഞു.