'നീലയുടെ നിറഭേദങ്ങൾ' ചിത്ര പ്രദർശനത്തിന് തുടക്കം

തിരുവനന്തപുരം: നീലിമയുടെ അനന്തസൗന്ദര്യം അനാവരണം ചെയ്ത്​ 'നീലയുടെ നിറഭേദങ്ങൾ' ചിത്ര പ്രദർശനത്തിന് മ്യൂസിയം ഓഡിറ്റോറിയത്തിൽ തുടക്കം. ആഗസ്റ്റ് എട്ടുവരെ നീളുന്ന പ്രദർശനം അബ്‌കാരി വെൽഫെയർ ബോർഡ് ചെയർമാൻ കെ.എസ്. സുനിൽകുമാറും ചിത്രകാരൻ ബി.ഡി. ദത്തനും ചേർന്ന് ഉദ്​ഘാടനം ചെയ്തു. ചിത്രകല വിദഗ്ധൻ ജോർജ് ഫെർണാണ്ടസ് മുഖ്യാതിഥിയായിരുന്നു. ചിത്രകാരനും കേരള ഫിനാൻഷ്യൽ കോർപറേഷന്റെ ഡെപ്യൂട്ടി ജനറൽ മാനേജറുമായ ആദർശ് ആർ. നായരാണ് കാൻവാസിൽ 'നീലയുടെ നിറഭേദങ്ങൾ' ഒരുക്കിയത്​. മറ്റു ചിത്രകാരിൽനിന്ന് വ്യത്യസ്തമായി നീല നിറത്തിന് മാത്രം പ്രധാന്യം നൽകിയുള്ള അക്രിലിക്ക്, ഓയിൽ പെയിന്റുകളിൽ തീർത്ത 34 ചിത്രങ്ങളാണ് പ്രദർശനത്തിനുള്ളത്​. പ്രകൃതി, മനുഷ്യൻ, വികാരങ്ങൾ എന്നിങ്ങനെ മൂന്ന് മേഖലകളിലായി നീലയുടെ വൈവിധ്യങ്ങളിൽ വിരിഞ്ഞ ചിത്രങ്ങളാണിവ. ഒഴിവുദിനങ്ങളിലും രാത്രികളിലും സമയം കണ്ടെത്തിയാണ് ചിത്രങ്ങൾ വരച്ചത്​. രാവിലെ 11 മുതൽ വൈകീട്ട് ഏഴുവരെ നീളുന്ന നാല് ദിവസത്തെ പ്രദർശനത്തിൽ പ്രവേശനം സൗജന്യമാണ്. ആദർശിന്റെ ജീവിത പങ്കാളിയായ ബിന്ദുവിന്റെ ചിത്ര കലയുമായി ബന്ധപ്പെട്ട യൂ ട്യൂബ് ചാനലായ 'ദി ഒൺ ഇന്ത്യൻ ആർട്ട്' ആണ് ചിത്രപ്രദർശനം ഒരുക്കിയിരിക്കുന്നത്.