സൈമൺ ബ്രിട്ടോ സ്മാരക പുരസ്‌കാരം വി.എസിനുവേണ്ടി മകൻ ഏറ്റുവാങ്ങി

തിരുവനന്തപുരം: തൃശൂർ ആസ്ഥാനമായ അഞ്ചേരി സൈമൺ ബ്രിട്ടോ സുഹൃദ് കൂട്ടായ്മയുടെയും കെ.എ. മാധവൻ സ്മാരക വായനശാലയുടെയും സൈമൺ ബ്രിട്ടോ സ്മാരക പുരസ്‌കാരം മുൻമുഖ്യമന്ത്രി വി.എസ്. അച്യുതാനന്ദനുവേണ്ടി മകൻ വി.എ. അരുൺകുമാർ ഏറ്റുവാങ്ങി. 10,000 രൂപയും ഫലകവും പ്രശസ്തിപത്രവുമടങ്ങുന്ന പുരസ്‌കാരം സി.പി.എം ജില്ല സെക്രട്ടറി ആനാവൂർ നാഗപ്പൻ നൽകി. സൈമൺ ബ്രിട്ടോ അനുസ്മരണ സമിതി ചെയർമാൻ ചെറിയാൻ ജോർജ് അധ്യക്ഷതവഹിച്ചു. പിതാവിനുവേണ്ടി അവാർഡ് വാങ്ങാൻ കഴിഞ്ഞതിൽ വളരെ സന്തോഷമുണ്ടെന്ന്​ അരുൺകുമാർ പറഞ്ഞു. ആരോഗ്യപരമായ കാരണങ്ങളാൽ വി.എസിന്​ യാത്ര ചെയ്യാൻ ബുദ്ധിമുട്ടുണ്ട്. അതിനാലാണ് താൻ എത്തിയതെന്നും അദ്ദേഹം പറഞ്ഞു. സൈമൺ ബ്രിട്ടോയുടെ ഭാര്യ സീന ഭാസ്‌കർ, മകൾ നിലാവ്, പി.ജി. അഗസ്​റ്റിൻ, ഭക്ഷ്യ കമീഷൻ അംഗം രമേശൻ, ഷാബു വർഗീസ്, എൻ.ഒ. ഷാജു, കെ.കെ. തോമസ്, ഡോ. കെ.പി. ജയപ്രകാശ് സുരേഷ്, സജീവൻ എന്നിവർ പ​ങ്കെടുത്തു.