തോന്നയ്ക്കൽ എ.ജെ കോളജിൽ സംഘർഷം; പൊലീസ് ലാത്തിച്ചാർജ് നടത്തി

മംഗലപുരം: തോന്നയ്ക്കൽ എ.ജെ കോളജിൽ വിദ്യാർഥികൾ തമ്മിൽ സംഘർഷം. പൊലീസ് ലാത്തിച്ചാർജ് നടത്തി. നിരവധി വിദ്യാർഥികൾക്ക് പരിക്കേറ്റു. വെള്ളിയാഴ്ച വൈകീട്ട്​ രണ്ടും മൂന്നും വർഷ ബിരുദ വിദ്യാർഥികൾ തമ്മിലാണ് സംഘർഷം നടന്നത്. രണ്ടാംവർഷ വിദ്യാർഥികൾ ബൈക്ക് റൈസിംഗ് നടത്തിയതുമായി ബന്ധപ്പെട്ട തർക്കമാണ് സംഘർഷത്തിൽ കലാശിച്ചത്. ബൈക്ക് റൈസിംഗിനെ മൂന്നാംവർഷ വിദ്യാർഥികൾ ചോദ്യംചെയ്തു. തുടർന്ന് കൂടുതൽ വിദ്യാർഥികൾ സംഘടിച്ചെത്തി. പ്രിൻസിപ്പൽ അറിയിച്ചതിനെ തുടർന്ന് മംഗലപുരം പൊലീസ് എത്തി. വിദ്യാർഥികൾ പൊലീസിന് നേരെ കല്ലെറിഞ്ഞു. കൂടുതൽ പൊലീസ് സ്ഥലത്തെത്തി ലാത്തിവീശി. വിദ്യാർഥികളുടെ കല്ലേറിൽ ഒരു പോലീസുദ്യോഗസ്ഥന്റെ കാലിന് പരിക്കേറ്റു. കാമ്പസിൽ കയറി വിദ്യാർഥികളെ പൊലീസ് മർദിച്ചെന്നാരോപിച്ച് എസ്.എഫ്.ഐ പ്രവർത്തകർ മംഗലപുരം പൊലീസിൽ പരാതി നൽകി.