373 നോൺ റെസിഡൻറ്​ ജൂനിയർ ഡോക്ടർമാരെ താൽക്കാലികമായി നിയമിക്കാൻ ഉത്തരവ്

തിരുവനന്തപുരം: ഒന്നാം വർഷ പി.ജി പ്രവേശനം വൈകുന്ന സാഹചര്യത്തിൽ മെഡിക്കൽ കോളജ് ആശുപത്രികളുടെ പ്രവർത്തനം സുഗമമാക്കാൻ 373 നോൺ റെസിഡൻറ്​ ജൂനിയർ ഡോക്ടർമാരെ താൽക്കാലികമായി നിയമിക്കാൻ ആരോഗ്യവകുപ്പ് ഉത്തരവായി. പുതിയ ബാച്ച് എത്തുംവരെ പ്രതിമാസം 45,000 രൂപ വേതനം നൽകിയാണ് നിയമനം. തിരുവനന്തപുരം 50, കോഴിക്കോട് 72, തൃശൂർ 72, കോട്ടയം 75, ആലപ്പുഴ 61, എറണാകുളം ഏഴ്​, കണ്ണൂർ 36 എന്നിങ്ങനെയാണ് ജൂനിയർ ഡോക്ടർമാരെ നിയമിക്കുന്നത്. പി.ജി പ്രവേശനം വൈകുന്നതിനാൽ കൂടുതൽ ഡോക്ടർമാരെ നിയമിക്കണമെന്നാവശ്യപ്പെട്ട് പി.ജി ഡോക്ടർമാർ സമരത്തിലാണ്. ചൊവ്വാഴ്ച രാത്രി പി.ജി അസോസിയേഷൻ പ്രതിനിധികളുമായി മന്ത്രി വീണ ജോർജ് നടത്തിയ ചർച്ചയുടെ അടിസ്ഥാനത്തിലാണ് ആരോഗ്യവകുപ്പ് ഉത്തരവിറക്കിയത്.