ഹൗസ്​ സർജൻമാരെ കൂട്ടിരിപ്പുകാർ കൈയേറ്റം ചെയ്തു, ഒരാൾ അറസ്റ്റിൽ

തിരുവനന്തപുരം: മെഡിക്കൽ കോളേജിൽ രണ്ട് ഹൗസ്​ സർജമാരെ കൂട്ടിരിപ്പുകാർ കൈയേറ്റം ചെയ്തു. സംഭവത്തിൽ രണ്ട് പേർ‌ക്കെതിരെ കേസടുത്തു. ഇതിൽ വക്കം സ്വദേശി അൻസറിനെ മെഡിക്കൽ കോളേജ് പൊലീസ് അറസ്റ്റ് ചെയ്തു. മെഡിസിൻ വനിതാ വാർഡിലെ ഹൗസ്​ സർജൻമാരെയാണ് ൈകയേറ്റം ചെയ്തത്.

ഇന്നലെ വൈകിട്ട് മൂന്നു മണിയോടെയായിരുന്നു സംഭവം. രോഗിയുടെ സി.ടി സ്കാൻ നടന്നില്ലെന്ന് ആരോപിച്ചായിരുന്നു മ‌ർദനം. കൂടുതൽഡോക്ടർമാരെത്തിയാണ് സ്ഥിതി ശാന്തമാക്കിയത്. മെഷീൻ തകരാറുകാരണം ബുധനാഴ്ച ആശുപത്രിയിൽ പ്രവേശിപ്പിച്ച രോഗിക്ക്​ സി.ടി സ്കാൻ ചെയ്യാൻ സാധിച്ചിരുന്നില്ല. രോഗിയുടെ നില ഗുരുതരമല്ലാത്തതിനാൽ പുറത്തുപോയി എടുക്കേണ്ടതില്ലെന്നും മെഷീൻ ശരിയാകുന്ന മുറക്ക്​ ആശുപത്രിയിൽ നിന്ന് സ്കാൻ ചെയ്യാമെന്ന് അറിയിക്കാനെത്തിയ ഹൗസ്​ സർജൻമാരെയാണ് കൈയേറ്റം ചെയ്തത്. മർദ്ദനമേറ്റ ഇരുവരയെും പ്രാഥമിക ചികിത്സക്ക് ശേഷം ഹോസ്റ്റലിലേക്ക് അയച്ചു.