തിരുവനന്തപുരം ജില്ലയിലെ ആദ്യ ഭൗമവിവര നഗരസഭയായി നെടുമങ്ങാട്

നെടുമങ്ങാട്: ജില്ലയിലെ ആദ്യത്തെ ഭൗമവിവര നഗരസഭയായി നെടുമങ്ങാട് നഗരസഭയെ പ്രഖ്യാപിച്ചു. നഗരസഭ കൗൺസിൽ ഹാളിൽ നടന്ന ചടങ്ങിൽ ജില്ലാ പഞ്ചായത്ത് പ്രസിഡൻറ്​ വി.കെ. മധു പ്രഖ്യാപനം നടത്തി.

സംസ്ഥാനത്തെ മൂന്നാമത്തെ ഭൗമവിവര നഗരസഭയാണ് നെടുമങ്ങാട്. പദ്ധതിയുടെ ഭാഗമായി നഗരസഭയിലെ മുഴുവൻ അടിസ്ഥാനവിവരങ്ങൾ വിവരശേഖരണമായും ഭൂപടമാതൃകയിലും ഉൾപ്പെടുത്തി ജിയോ ഗ്രാഫിക് ഇൻഫർമേഷൻ സിസ്​റ്റം (ജി.​െഎ.എസ്​) എന്ന സോഫ്​റ്റ്​വെയറാണ് തയാറാക്കിയിരിക്കുന്നത്. കരകുളം ഗ്രാമീണ പഠനകേന്ദ്രത്തി​െൻറ സാങ്കേതിക സഹായത്തോടെ 21 ലക്ഷം രൂപ വിനിയോഗിച്ചാണ് പദ്ധതി നടപ്പാക്കിയത്. നഗരസഭയുടെ പരിധിയിൽവരുന്ന വീടുകൾ, കെട്ടിടങ്ങൾ എന്നിവ കെട്ടിട നമ്പറി​െൻറ അടിസ്ഥാനത്തിൽ ഭൂപടത്തിൽ രേഖപ്പെടുത്തിയിരിക്കുന്നു.

റോഡുകൾ, അങ്കണവാടികൾ, സ്കൂളുകൾ, മറ്റ്​ പൊതു ഇടങ്ങൾ, ജലസ്രോതസ്സുകൾ, കൃഷിയിടങ്ങൾ തുടങ്ങിയവയുടെ സ്ഥാനങ്ങളും അവിടേക്ക് എത്തിച്ചേരാനുള്ള റോഡുകളും വ്യക്തമാക്കുന്ന ഡിജിറ്റൽ മാപ്പിങ് ഇതിലൂടെ ലഭ്യമാണ്. കൂടാതെ ഓരോ വീടി​െൻറയും സാമൂഹിക-സാമ്പത്തികസ്ഥിതി, അംഗങ്ങളുടെ അടിസ്ഥാനവിവരങ്ങൾ, വളർത്തുമൃഗങ്ങൾ, പൊതു ടാപ്പുകൾ, വഴിവിളക്കുകൾ തുടങ്ങിയവയുടെയെല്ലാം കൃത്യമായ വിവരങ്ങൾ പൊതുജനങ്ങൾക്ക് വിരൽത്തുമ്പിൽ ലഭ്യമാക്കുകയാണ് പദ്ധതിയുടെ ലക്ഷ്യം.

വിവരശേഖരണത്തിന്​ ഓരോ വാർഡിൽനിന്നും രണ്ട് പ്രവർത്തകരെ വീതം ചുമതലപ്പെടുത്തിയിരുന്നു. വീടുകൾ, സർക്കാർ - അർധസർക്കാർ സ്ഥാപനങ്ങൾ, വിദ്യാഭ്യാസ സ്ഥാപനങ്ങൾ തുടങ്ങി നിരവധിയിടങ്ങളിൽനിന്ന്​ സർവേ പ്രവർത്തനങ്ങൾ നടത്തിയാണ് വിവരങ്ങൾ ശേഖരിച്ചത്.

ജി.​െഎ.എസ്​ സോഫ്​റ്റ്​വെയർ പ്രവർത്തനക്ഷമമാകുന്നതോടെ നഗരസഭയുടെ ദൈനംദിന പ്രവർത്തനങ്ങളും പദ്ധതി ആസൂത്രണവും നടത്തിപ്പും കൂടുതൽ സുഗമമാകും.

നഗരസഭയിൽ പ്രവർത്തിക്കുന്ന സർക്കാർ വകുപ്പുകൾക്കും ഭൗമവിവരശേഖരം പ്രയോജനപ്രദമാകും. ആവശ്യാനുസരണം സോഫ്​റ്റ്​വെയറിൽ വിവരങ്ങളുടെ കൂട്ടിച്ചേർക്കലുകളും ഒഴിവാക്കലുകളും വരുത്താവുന്നതാണ്. നഗരസഭാ ചെയർമാൻ ചെറ്റച്ചൽ സഹദേവൻ, നഗരസഭാ വൈസ് ചെയർപേഴ്സൺ ലേഖാ വിക്രമൻ, നഗരസഭ സ്​റ്റാൻഡിങ്​ കമ്മിറ്റി അധ്യക്ഷന്മാരായ പി. ഹരികേശൻ, ടി.ആർ. സുരേഷ്, കെ. ഗീതാകുമാരി, വിവിധ ജനപ്രതിനിധികൾ, നഗരസഭ സെക്രട്ടറി സ്​റ്റാലിൻ നാരായണൻ, നഗരസഭ എൻജിനീയർ പി. കൃഷ്ണകുമാർ എന്നിവർ പങ്കെടുത്തു.