അപകടത്തെ ചൊല്ലിയുണ്ടായ തർക്കം; സിവിൽ പൊലീസ് ഓഫിസർക്ക് മർദനമേറ്റു

നേമം: വാഹനാപകടത്തെ ചൊല്ലിയുണ്ടായ തർക്കത്തിനിടെ സിവിൽ പൊലീസ് ഓഫിസർക്ക് മർദനമേറ്റു. തിരുവനന്തപുരം നന്ദാവനം എ.ആർ ക്യാമ്പിലെ സിവിൽ പൊലീസ് ഓഫിസർ അഭിജിത്തിനാണ് മർദനമേറ്റത്. ശനിയാഴ്ച വൈകുന്നേരം പ്രാവച്ചമ്പലം ജങ്​ഷനിലായിരുന്നു സംഭവം.

അഭിജിത്ത് സഞ്ചരിച്ചിരുന്ന വാഹനം മറ്റു രണ്ടുപേർ സഞ്ചരിച്ചിരുന്ന വേറൊരു വാഹനവുമായി ഇടിച്ചതിനെതുടർന്നാണ് തർക്കമുണ്ടായത്. വാക്കുതർക്കം തുടരുന്നതിനിടെ രണ്ടംഗസംഘം അഭിജിത്തിനെ മർദിക്കുകയായിരുന്നു.

തലക്ക്​​ പരിക്കേറ്റ പൊലീസ് ഉദ്യോഗസ്ഥനെ ആദ്യം ശാന്തിവിള താലൂക്കാശുപത്രിയിലും അവിടെനിന്ന് തിരുവനന്തപുരം മെഡിക്കൽ കോളജ് ആശുപത്രിയിലും പ്രവേശിപ്പിച്ചു. പരാതിയുടെ അടിസ്ഥാനത്തിൽ നടത്തിയ അന്വേഷണത്തിനൊടുവിൽ പ്രാവച്ചമ്പലം സ്വദേശികളായ രമേശ്, ബിജു എന്നിവർക്കെതിരെ നേമം പൊലീസ് കേസെടുത്തു.