വഴക്കു പറയുമോയെന്ന ഭയം; വീട്ടിൽനിന്നിറങ്ങിയ 11കാരനെ പൊലീസ് കണ്ടെത്തി

നേമം: വീട്ടുകാർ വഴക്കുപറയുമോ എന്ന ഭയംമൂലം വീട്ടിൽനിന്നിറങ്ങിയ 11 വയസ്സുകാരനെ പൊലീസ് കണ്ടെത്തി സുരക്ഷിതമായി രക്ഷിതാക്കളെ ഏൽപ്പിച്ചു. വെള്ളായണി സ്വദേശിയായ കുട്ടിയെയാണ് ശനിയാഴ്ച വൈകുന്നേരം വീട്ടിൽ നിന്നും കാണാതായത്.

കുട്ടിയും സഹോദരിയും തമ്മിൽ അടിപിടിയുണ്ടായിരുന്നു. സഹോദരിയെ അടിച്ചത് വീട്ടുകാർ അറിയുമ്പോൾ വഴക്കു പറയുമോ എന്ന ഭയം കാരണമാണ് കുട്ടി വീട്ടിൽ നിന്നിറങ്ങിയത്. കുട്ടിയെ കാണാതായതോടെ വീട്ടുകാർ നേമം പൊലീസിൽ പരാതി നൽകി.

പൊലീസിന്‍റെ അന്വേഷണത്തിലാണ് സ്റ്റേഷൻ പരിധിയിൽ തെന്നൂർ ഭാഗത്തുനിന്ന് കുട്ടിയെ കണ്ടെത്തിയത്. തുടർന്ന് രക്ഷിതാക്കളെ വിളിച്ചുവരുത്തിയ ശേഷം കുട്ടിയെ അവർക്കൊപ്പം വിടുകയായിരുന്നു.