വിളവൂർക്കലിൽ അജ്ഞാത ജീവിയുടെ ആക്രമണം; 25 കോഴികൾ ചത്തു

നേമം: വിളവൂർക്കലിൽ അജ്ഞാത ജീവിയുടെ ആക്രമണത്തിൽ 25 കോഴികൾ ചത്തു. പൊറ്റയിൽ കുറക്കോണത്ത് കിഴക്കിൻകര പുത്തൻവീട്ടിൽ മോഹനന്റെ കോമ്പൗണ്ടിൽ വളർത്തിയിരുന്ന കോഴികളാണ് ആക്രമണത്തിന് ഇരയായത്. ബുധനാഴ്ച പുലർച്ച നാലോടുകൂടിയാണ് സംഭവമെന്ന് കരുതുന്നു.

ചുറ്റുമതിലുള്ള വീട്ടിൽ കോഴികൾക്കുള്ള സംരക്ഷണം ഒരുക്കുന്നതിന് വല കെട്ടിയിരുന്നു. മതിൽ ചാടിക്കടന്നെത്തിയ അജ്ഞാത ജീവി കൂടിന്റെ പൂട്ട് തകർത്ത ശേഷമാണ് കോഴികളെ കൊന്നത്. രണ്ടുകോഴികളെ കൊണ്ടുപോകുകയും ചെയ്തു.

രാവിലെ ആറോടെ വീട്ടുകാർ ഉണർന്നപ്പോഴാണ് വിവരമറിയുന്നത്. ചത്ത കോഴികളുടെയെല്ലാം കഴുത്തിൽ ആഴത്തിലുള്ള മുറിവുണ്ട്. കാട്ടുപൂച്ചയാണോ കോഴികളെ കൊന്നതെന്നു സംശയമുണ്ട്. ഈഴക്കോട്, കോളച്ചിറ ഭാഗങ്ങളിലും അജ്ഞാത ജീവിയുടെ ആക്രമണം ഉണ്ടായതായി പരാതിയുണ്ട്.