സുധാകരന്​ വേണ്ടി കെ.പി.സി.സി ആസ്ഥാനത്ത്​ പ്രതിഷേധം

തിരുവനന്തപുരം: കെ. സുധാകരന്​ വേണ്ടി കെ.പി.സി.സി ആസ്ഥാനത്തിന്​ മുന്നിൽ യുവാക്കളുടെ പ്രതിഷേധം. സുധാകരനെ കെ.​പി.സി.സി അധ്യക്ഷനാക്കി പാർട്ടിയെ രക്ഷിക്കണമെന്ന്​ ആവശ്യ​െപ്പട്ടായിരുന്നു ഇൗരാറ്റുപേട്ട സ്വദേശികളായി​ മൂന്ന്​ യുവാക്കൾ ബാനറുമായി പ്രതിഷേധിച്ചത്​. സംഭവം ശ്രദ്ധയില്‍പെട്ട സുധാകര​െൻറ പേഴ്‌സനല്‍ സ്​റ്റാഫംഗങ്ങളെത്തി പ്രതിഷേധക്കാരെ സ്ഥലത്ത്നിന്ന് മാറ്റി.

'കെ.സുധാകരനെ വിളിക്കൂ; കോൺഗ്രസിനെ രക്ഷിക്കൂ, ഗ്രൂപ്പിസം അവസാനിപ്പിക്കുക, കെ. സുധാകരനെ വിളിച്ച് കോണ്‍ഗ്രസിനെ രക്ഷിക്കുക' തുടങ്ങിയ വാചകങ്ങള്‍ എഴുതി സുധാകര​െൻറ ഫോട്ടോ പതിപ്പിച്ച ബാനറുമായാണ് മൂന്ന്​ യുവാക്കൾ വെള്ളിയാഴ്​ച യു.ഡി.എഫ്​ യോഗത്തിന്​ നേതാക്കൾ എത്തുംമുമ്പ്​ പ്രതിഷേധം തുടങ്ങിയത്​. സംഭവം ശ്രദ്ധയില്‍പെട്ടതോടെ തലസ്ഥാനത്ത്​ സുധാകര​െൻറ പേഴ്​സനൽ സ്​റ്റാഫിൽ ഉൾപ്പെട്ടവർ സ്ഥലത്തെത്തി. പ്രതിഷേധക്കാരിൽനിന്ന്​ ബാനറുകളും മറ്റും പിടിച്ചുവാങ്ങിയ അവർ പ്രതിഷേധം അവസാനിപ്പിക്കണമെന്ന്​ ആവശ്യപ്പെട്ടു. വഴങ്ങാതിരുന്നതോടെ വാഗ്വാദവുമുണ്ടായി.

രംഗം വഷളാകുന്നുവെന്ന്​ കണ്ടതോടെ പ്രതിഷേധിച്ചവർ കാറില്‍കയറി മടങ്ങി. അതേസമയം, കെ.പി.സി.സി അധ്യക്ഷ​െൻറ കാര്യത്തിൽ തീരുമാനമെടുക്കാനുള്ള ഹൈകമാൻഡ്​ നടപടിക്രമങ്ങള്‍ പുരോഗമിക്കുന്നതിനിടയിൽ നടത്തുന്ന ഇത്തരം പ്രതിഷേധങ്ങൾ സുധാകരനെ അപമാനിക്കാനാ​െണന്ന്​ അദ്ദേഹത്തി​െൻറ പേഴ്​സനൽ സ്​റ്റാഫ്​ അംഗങ്ങൾ പറഞ്ഞു.